மத்திய கிழக்கு பிராந்தியத்தில் ஈரான் மீது அமெரிக்கா மேற்கொண்ட ராணுவ நடவடிக்கைகளுக்கு ஐக்கிய அரபு அமீரகம் நேரடி ஆதரவு வழங்கியதாக ஈரான் அரசு பகிரங்கமாக குற்றம் சாட்டியுள்ளது. டெல்லியில் நடைபெற்ற பிரிக்ஸ் நாடுகளின் பாதுகாப்பு முகமைத் தலைவர்கள் மற்றும் தேசிய பாதுகாப்பு ஆலோசகர்களின் 16-வது ஆலோசனைக் கூட்டத்தில் இந்தத் தகவல்கள் வெளியாகியுள்ளன.
பிரிக்ஸ் கூட்டத்தில் முன்வைக்கப்பட்ட குற்றச்சாட்டு
இந்த உயர்மட்ட ஆலோசனைக் கூட்டத்தில் உரையாற்றிய ஈரான் தேசிய பாதுகாப்பு மன்றத்தின் துணைச் செயலாளர் கதிர் நெசாமிபூர், ஹார்மூஸ் நீரிணை பகுதியில் நிலவும் பதற்றமான சூழலுக்கும், அங்குள்ள ஆக்கிரமிப்பு நடவடிக்கைகளுக்கும் அமெரிக்காவும் சியோனிச ஆட்சியுமே முதன்மைக் காரணம் என்று குறிப்பிட்டார். சர்வதேச சமூகம் இந்த உண்மையை உணர வேண்டும் என்றும் அவர் வலியுறுத்தினார்.
மேலும், அமெரிக்கப் படைகள் ஐக்கிய அரபு அமீரகத்தில் உள்ள தளங்களைப் பயன்படுத்தி ஈரானை நோக்கித் தாக்குதல்களை நடத்தியதாக அவர் தெரிவித்தார். அமெரிக்காவின் இத்தகைய விரோதச் செயல்களைக் கண்டித்திருக்க வேண்டிய ஐக்கிய அரபு அமீரகம், அதற்கு ஆதரவாகச் செயல்பட்டுள்ளதாக நெசாமிபூர் குற்றம் சாட்டினார்.
மருத்துவமனைகள் மற்றும் பள்ளிகள் மீதான தாக்குதல்
தொடர்ந்து பேசிய அவர், ஈரானில் உள்ள பொதுப் பயன்பாட்டு இடங்களான பள்ளிகள் மற்றும் மருத்துவமனைகள் மீது அமெரிக்கா தாக்குதல் நடத்தத் திட்டமிட்டபோது, அதற்குத் தேவையான ராணுவத் தளங்களை ஐக்கிய அரபு அமீரகம் பயன்படுத்த அனுமதித்ததாகக் கூறினார். இது பிராந்திய பாதுகாப்பிற்குப் பெரும் அச்சுறுத்தலாக அமைந்துள்ளதாக ஈரான் தரப்பு கருதுகிறது.
இருப்பினும், ஐக்கிய அரபு அமீரகம் இத்தகைய சாகச நடவடிக்கைகளில் ஈடுபடுவதைத் தவிர்த்து, அண்டை நாடுகளுடனான நல்லிணக்கக் கொள்கைகளை மதித்து செயல்பட வேண்டும் என்று அவர் கேட்டுக்கொண்டார். அமைதி மற்றும் ஸ்திரத்தன்மை வழியில் பயணிக்க வேண்டும் என்பதே ஈரானின் விருப்பம் என்றும், பிராந்திய ஒத்துழைப்புக்கான பாதையை ஐக்கிய அரபு அமீரகம் தேர்ந்தெடுக்க வேண்டும் என்றும் கதிர் நெசாமிபூர் தனது உரையில் குறிப்பிட்டுள்ளார்.
Leave a Reply