தமிழகத்தில் கூட்டுறவு வங்கிகளில் விவசாயிகள் பெற்ற பயிர்க்கடனை தள்ளுபடி செய்வது தொடர்பாக, தமிழக அரசு ரிசர்வ் வங்கி விதிமுறைகளைக் காரணம் காட்டி செயல்படுவது விவசாயிகளை ஏமாற்றும் செயலாகும் எனத் தங்கம் தென்னரசு தெரிவித்துள்ளார்.
இது குறித்து அவர் தனது எக்ஸ் சமூக வலைதளப் பக்கத்தில் வெளியிட்டுள்ள பதிவில், தேர்தல் நேரத்தில் வாக்குறுதிகளை வழங்கும் போது ரிசர்வ் வங்கியின் விதிமுறைகள் குறித்து அரசு மௌனமாக இருந்ததாகவும், தற்போது ஆட்சி பொறுப்பில் அமர்ந்து அந்த வாக்குறுதிகளை நிறைவேற்ற வேண்டிய சூழல் வந்தவுடன் மட்டும் திடீரென அந்த விதிமுறைகள் முன்னுக்கு வருகின்றன என்றும் கேள்வி எழுப்பியுள்ளார்.
நிர்வாகத் திறமையின்மையா அல்லது திட்டமிட்ட நகர்வா?
கூட்டுறவு வங்கிகளில் விவசாயிகள் பெற்ற பயிர்க்கடன் தள்ளுபடி செய்யப்பட்டுள்ளது என்று தமிழக நிதியமைச்சர் சமீபத்தில் விளக்கம் அளித்துள்ளார். ஆனால், ரிசர்வ் வங்கியின் வழிகாட்டுதல்கள் கடந்த ஆண்டு நவம்பர் 28-ஆம் தேதியே வழங்கப்பட்டிருந்தது. இந்த வழிகாட்டுதல்களை முழுமையாக அறிந்து கொண்ட பின்னரே, கடந்த ஏப்ரல் 16-ஆம் தேதி தேர்தல் அறிக்கையில் குறிப்பிட்ட வாக்குறுதிகள் வழங்கப்பட்டதாக தங்கம் தென்னரசு குறிப்பிட்டுள்ளார்.
ஐந்து ஏக்கருக்குள் நிலம் வைத்துள்ள விவசாயிகளின் கடன் முழுமையாகவும், ஐந்து ஏக்கருக்கு மேல் நிலம் வைத்திருப்பவர்களின் கடன் 50 விழுக்காடு தள்ளுபடி செய்யப்படும் என்ற வாக்குறுதி தெளிவாகத் தெரிந்து கொண்டே வழங்கப்பட்டதாக அவர் சாடியுள்ளார். அவ்வாறு வாக்குறுதி அளித்துவிட்டு, தற்போது ரிசர்வ் வங்கியைக் காரணம் காட்டி அதனை மறுப்பது விவசாயிகளை முற்றிலும் ஏமாற்றும் செயலாகும் என்று அவர் தெரிவித்துள்ளார்.
நிதி நிலை அறிக்கையில் அறிவிப்பு வெளியிடக் கோரிக்கை
தொடர்ந்து தனது பதிவில், தேர்தலுக்கு முன்னதாக அளித்த வாக்குறுதிப்படி, அரசின் முதல் நிதி நிலை அறிக்கையிலேயே விவசாயிகளின் பயிர்க்கடனை முழுமையாக தள்ளுபடி செய்யும் அறிவிப்பை வெளியிட வேண்டும் என்று வலியுறுத்தியுள்ளார். பொய்யான வாக்குறுதிகளை வழங்கி விவசாயிகளுக்கு நம்பிக்கை அளித்துவிட்டு, தற்போது யாருக்கும் பயன்படாத வகையில் அரைகுறையாகக் கடன் தள்ளுபடி செய்திருப்பதாகக் கூறுவது விவசாயப் பெருங்குடி மக்களுக்கு இழைக்கப்படும் துரோகம் என்று அவர் கடுமையாக விமர்சித்துள்ளார்.
