திமுக பொதுச்செயலாளரும், தமிழக முதலமைச்சருமான மு.க.ஸ்டாலின், கட்சியின் நிர்வாகிகள் மற்றும் பொதுமக்களின் கருத்துக்களை நேரடியாகத் தெரிந்துகொள்ளும் நோக்கில் செயல்பட்டு வரும் ‘உடன்பிறப்பின் குரல்’ இணையதளம் குறித்த முக்கிய அறிவிப்பை வெளியிட்டுள்ளார்.
தன்னுடைய எக்ஸ் சமூக வலைதளப் பக்கத்தில் பதிவிட்டுள்ள அவர், udanpirapinkural.in என்ற இணையதளத்தில் இதுவரை சுமார் 4.60 லட்சம் கருத்துகள் பதிவாகியுள்ளதாகத் தெரிவித்துள்ளார். கட்சி உறுப்பினர்கள் மட்டுமன்றி, பொதுமக்களும் தங்களின் மனதில் தோன்றும் கருத்துக்களை எவ்விதத் தயக்கமுமின்றி இந்தப் பக்கத்தில் பதிவு செய்ய வேண்டும் என்று அவர் கேட்டுக்கொண்டுள்ளார்.
நடவடிக்கைகளைத் திட்டமிட ஆலோசனைகள் அவசியம்
இந்த இணையதளம் மூலம் பெறப்படும் கருத்துகள் அனைத்தும் நேரடியாகத் தன்னையே சென்றடையும் என்று குறிப்பிட்டுள்ள முதலமைச்சர், கழக நிர்வாகிகள், கட்சி அனுதாபிகள் மற்றும் பொதுமக்கள் அளிக்கும் ஆலோசனைகளை விரிவாக ஆராயப்போவதாகத் தெரிவித்துள்ளார். இந்த ஆலோசனைகளின் அடிப்படையில் கட்சியின் அடுத்தகட்ட நடவடிக்கைகளைத் திட்டமிடுவேன் என்றும் அவர் குறிப்பிட்டுள்ளார்.
மே 31-ஆம் தேதி வரை கால அவகாசம்
கருத்துக்களைப் பதிவு செய்ய விரும்புவோர் வரும் மே மாதம் 31-ஆம் தேதிக்குள் குறிப்பிட்ட இணையதளத்தில் தங்கள் கருத்துகளைப் பதிவு செய்யுமாறு அவர் வலியுறுத்தியுள்ளார். மேலும், இந்தத் தகவல் அனைத்து கட்சித் தொண்டர்களுக்கும் சென்றடைவதை உறுதி செய்ய வேண்டும் என்று கேட்டுக்கொண்டார்.
இதற்காக, கழகத்தின் மாநிலப் பொறுப்பாளர்கள், மாவட்டச் செயலாளர்கள், சட்டமன்ற உறுப்பினர்கள் மற்றும் நாடாளுமன்ற உறுப்பினர்கள் ஆகியோர் தங்களது சமூக வலைதளப் பக்கங்கள் மற்றும் வாட்ஸ்அப் குழுக்கள் வாயிலாக இந்தத் தகவலைப் பகிர்ந்து கொள்ள வேண்டும் என்று முதலமைச்சர் மு.க.ஸ்டாலின் வேண்டுகோள் விடுத்துள்ளார்.
