தமிழகத்தில் முதல்வர் விஜய் தலைமையிலான தமிழக வெற்றிக் கழக ஆட்சியை கவிழ்க்கும் நோக்கில் திட்டமிட்டு செயல்பட்ட நபர்கள் உட்பட ஆறு பேர் கைது செய்யப்பட்டுள்ளனர். எம்.எல்.ஏக்களின் கட்சி மனமாற்றத்தை தூண்டுவதற்காக மர்ம நபர்கள் சிலர் பேரம் பேசியது இந்த கைது நடவடிக்கைக்கு காரணமாகும்.
எம்.எல்.ஏ இளையராஜா அளித்த புகார்
கிருஷ்ணகிரி மாவட்டம் ஊத்தங்கரை தொகுதியைச் சேர்ந்த தமிழக வெற்றிக் கழக சட்டமன்ற உறுப்பினர் இளையராஜாவிடம், கட்சி மாறுமாறு மர்ம நபர்கள் சிலர் அணுகி பேரம் பேசியுள்ளனர். இது குறித்து அவர் திருவல்லிக்கேணி காவல் நிலையத்தில் புகார் அளித்தார். புகாரின் அடிப்படையில் வழக்குப் பதிவு செய்த போலீசார், விவகாரத்தை தீவிரமாக விசாரித்து வந்தனர்.
யூடியூபர் மற்றும் ஆதரவாளர்கள் கைது
இந்த வழக்கில் முதற்கட்ட விசாரணையின் போது, சென்னையைச் சேர்ந்த திருநாவுக்கரசு என்ற யூடியூபர் கைது செய்யப்பட்டார். இவர் லயோலா கல்லூரி முன்னாள் மாணவர்கள் என்ற பெயரில் தேர்தல் கருத்து கணிப்புகளை வெளியிடும் செயலில் ஈடுபட்டு வந்தவர். அவரிடமிருந்து பெறப்பட்ட தகவல்களைக் கொண்டு கரூரைச் சேர்ந்த கார்த்திக் மற்றும் ரமேஷ் ஆகிய இருவரையும் போலீசார் கைது செய்தனர்.
கைது செய்யப்பட்ட இவர்கள் முன்னாள் அமைச்சர் செந்தில் பாலாஜிக்கு நெருக்கமானவர்கள் என்று கூறப்படுகிறது. இதுவரை இந்த வழக்கில் மொத்தம் ஆறு பேர் கைது செய்யப்பட்டுள்ளனர்.
அமைச்சர் நிர்மல் குமாரின் குற்றச்சாட்டு
இந்தச் சம்பவம் குறித்து செய்தியாளர்களிடம் பேசிய அமைச்சர் நிர்மல் குமார், தமிழகத்தில் தவெக ஆட்சியை கவிழ்க்க திட்டமிட்டு சிலர் செயல்பட்டு வருவதாகக் குற்றம் சாட்டினார். திமுக மற்றும் அதிமுக ஆகிய கட்சிகள் இணைந்து ஆட்சி அமைக்க முயற்சி செய்ததால், அந்த கட்சிகளில் இருந்து பலர் தற்போது தமிழக வெற்றிக் கழகத்தில் இணைய விரும்புவதாக அவர் தெரிவித்தார். அதே நேரத்தில், குறுக்கு வழியில் ஆட்சியைப் பிடிக்க இன்னும் சிலர் முயற்சி செய்து வருவதாகவும் அவர் குறிப்பிட்டார்.
Leave a Reply