கத்தார் எரிவாயு ஆலை வெடிவிபத்து: 12 இந்தியர்கள் உட்பட 13 பேர் பலி

கத்தாரின் ராஸ்லபான் தொழிற்பேட்டையில் அமைந்துள்ள எரிவாயு ஆலையில் ஏற்பட்ட திடீர் வெடிவிபத்தில், 12 இந்தியர்கள் உட்பட மொத்தம் 13 பேர் உயிரிழந்தனர். இந்த விபத்தில் மேலும் 66 பேர் படுகாயமடைந்து மருத்துவமனையில் அனுமதிக்கப்பட்டுள்ளனர்.

ஈரானிய தாக்குதல்களால் ஏற்கனவே சேதமடைந்திருந்த இந்த ஆலை, தற்போது மீண்டும் செயல்பாட்டுக்கு வரும் வகையில் பராமரிப்பு மற்றும் சீரமைப்பு பணிகளில் ஈடுபட்டிருந்தது. அப்போது எதிர்பாராத விதமாக ஆலை ஒன்றில் சக்திவாய்ந்த வெடிவிபத்து நிகழ்ந்து, தீ மிக வேகமாகப் பரவியது.

உயிரிழப்புகள் மற்றும் காயங்கள்

இந்த விபத்து குறித்து கத்தார் எரிசக்தி அமைச்சர் சாத் அல் காபி அதிகாரப்பூர்வமாக உறுதிப்படுத்தியுள்ளார். அவர் கூறுகையில், “இந்த விபத்தில் இந்தியா மற்றும் பாகிஸ்தான் குடியுரிமை பெற்ற 13 பேர் உயிரிழந்தனர். மேலும் 66 பேர் காயமடைந்து சிகிச்சை பெற்று வருகின்றனர். காயமடைந்தவர்களின் உடல்நிலை தற்போது சீராக உள்ளது, அவர்களுக்கு உயிருக்கு ஆபத்தில்லை” என்று தெரிவித்தார்.

வெடிவிபத்தின் பாதிப்பு மற்றும் அதிர்வுகள் ராஸ்லபான் நகரில் இருந்து சுமார் 70 கிலோமீட்டர் தொலைவு வரை உணரப்பட்டதாகத் தகவல்கள் தெரிவிக்கின்றன.

இந்திய தூதரகத்தின் நடவடிக்கை

உயிரிழந்த இந்தியர்களின் குடும்பத்தினருக்கு தோஹாவில் உள்ள இந்திய தூதரகம் தனது ஆழ்ந்த இரங்கலைத் தெரிவித்துக்கொண்டுள்ளது. விபத்தில் பாதிக்கப்பட்டவர்களின் விவரங்களைச் சேகரிக்கும் பணியில் தூதரக அதிகாரிகள் ஈடுபட்டுள்ளனர். மேலும், பாதிக்கப்பட்ட தொழிலாளர்களின் உரிமைகள் மற்றும் மீட்பு நடவடிக்கைகள் குறித்து கத்தார் அரசாங்க அதிகாரிகளுடன் இந்திய தூதரகம் தொடர்ந்து தொடர்பில் இருப்பதாகவும் தெரிவிக்கப்பட்டுள்ளது.

#internationalNews #qatar #accident #indianDiaspora #கத்தார் எரிவாயு ஆலையில் விபத்து #இந்தியர்கள் 12 பேர் உள்பட 13 பேர் பலி #qatarmLng #gas #qatarFire #கத்தார் எரிவாயு