இந்தியாவின் பொதுத்துறை எண்ணெய் நிறுவனங்கள் முன்வைத்த E20 (20 சதவீதம் எத்தனால் கலக்கப்பட்ட) பெட்ரோல் விநியோக திட்டத்தை அண்டை நாடான பூட்டான் திட்டவட்டமாக நிராகரித்துள்ளது. இந்திய சந்தையில் தற்போது நடைமுறைப்படுத்தப்பட்டு வரும் இந்த எரிபொருள் மாற்றமானது, பூட்டானின் நிலப்பரப்பு மற்றும் வாகனத் தேவைகளுக்கு உகந்ததாக இல்லை என்பது அந்நாட்டு அரசின் முடிவாகும்.
தற்போது இந்தியாவில் E20 பெட்ரோல் பயன்பாடு கட்டாயமாக்கப்பட்டு வரும் சூழலில், வாகனங்களின் செயல்திறன் மற்றும் மைலேஜ் பாதிப்பு குறித்து விவாதங்கள் எழுந்துள்ளன. இந்த நிலையில், இந்திய சந்தையில் சாதாரண பெட்ரோல் கிடைக்கும் வரை, தங்கள் நாட்டிற்கு அதையே தொடர்ந்து விநியோகம் செய்ய வேண்டும் என்று பூட்டான் அரசு அதிகாரப்பூர்வமாகக் கோரிக்கை விடுத்துள்ளது.
புவியியல் மற்றும் தொழில்நுட்ப சவால்கள்
சுற்றுச்சூழலுக்கு உகந்த தூய்மையான எரிபொருளை பூட்டான் எதிர்க்கவில்லை என்றாலும், அதன் தனித்துவமான புவியியல் அமைப்பு மற்றும் உள்கட்டமைப்பு வசதிகளே இந்த முடிவுக்குக் காரணமாக அமைந்துள்ளதாகத் தெரிவிக்கப்பட்டுள்ளது. எத்தனால் கலந்த எரிபொருட்கள் காற்றில் உள்ள ஈரப்பதத்தை எளிதில் உறிஞ்சும் தன்மை கொண்டவை.
பூட்டான் போன்ற மலைப்பாங்கான மற்றும் செங்குத்தான நிலப்பரப்பில் அமைந்துள்ள பழைய எரிபொருள் சேமிப்பு கிடங்குகளில், ஈரப்பதம் கசிவதற்கான வாய்ப்புகள் அதிகம். இதனால் எரிபொருளின் தரம் பாதிக்கப்பட்டு, வாகனங்களின் இயந்திரங்கள் பழுதடையும் அபாயம் இருப்பதாக அந்நாட்டு அதிகாரிகள் கவலை தெரிவித்துள்ளனர்.
இயந்திர பாதிப்பு மற்றும் பொருளாதாரச் சுமை
மலைப்பாதைகளில் வாகனங்களை இயக்குவதற்கு அதிக இயந்திரத் திறன் தேவைப்படும். இத்தகைய சூழலில் எத்தனால் கலந்த பெட்ரோல் போதுமான ஆற்றலை வழங்காது என்று பூட்டான் தொழில்நுட்ப வல்லுநர்கள் கருதுகின்றனர். மேலும், E20 எரிபொருளுக்கு ஏற்றவாறு வடிவமைக்கப்படாத பழைய வாகனங்களை பூட்டானில் பலர் பயன்படுத்தி வருகின்றனர்.
இந்த எரிபொருளைப் பயன்படுத்தினால் இயந்திரப் பழுதுகள் அதிகரிக்கும் என்றும், அதன் காரணமாக ஆண்டுக்கு 5,000 முதல் 10,000 ரூபாய் வரை கூடுதல் பராமரிப்புச் செலவு ஏற்படும் என்றும் அந்நாட்டு பணிமனை ஆய்வுகள் எச்சரித்துள்ளன. பிரேசில் போன்ற நாடுகளில் எத்தனால் எரிபொருட்களுக்கு மானியம் வழங்கப்பட்டு விலை குறைக்கப்பட்டுள்ளது. ஆனால், இந்தியாவில் இது சாதாரண பெட்ரோல் விலையிலேயே விற்பனை செய்யப்படுவதால், நுகர்வோரே கூடுதல் செலவை ஏற்க வேண்டிய நிலை உள்ளது.
இந்த உள்கட்டமைப்பு மற்றும் பொருளாதாரக் காரணங்களை முன்வைத்தே, தற்போதைக்கு E20 பெட்ரோல் விநியோகத்தைத் தவிர்க்க வேண்டும் என்று பூட்டான் அரசு முடிவு செய்துள்ளது.
Leave a Reply