தமிழக அரசு வழக்கறிஞர்களை நியமிக்கும் நடைமுறையில் பெரும் முறைகேடுகள் மற்றும் லஞ்சப் பரிமாற்றங்கள் நடைபெற்று வருவதாக அமமுக பொதுச்செயலாளர் டிடிவி தினகரன் குற்றம் சாட்டியுள்ளார். இது தொடர்பாக அவர் தனது எக்ஸ் தளத்தில் பதிவிட்டுள்ளார்.
நியமனங்களில் லஞ்ச வேட்டை
தவெக அரசு நிர்வாகத்தில் தூய்மையான அரசியல் என்று சொல்லப்பட்ட நிலையில், அரசு வழக்கறிஞர் நியமனங்களுக்காக சொந்தக் கட்சி நிர்வாகிகளிடமே லஞ்சம் வசூலிக்கப்படுவதாகப் புகார்கள் எழுந்துள்ளதாக அவர் குறிப்பிட்டுள்ளார். குறிப்பாக, வாணியம்பாடியில் ஆடு திருட்டு வழக்கில் தொடர்புடைய நபருக்கு அரசு வழக்கறிஞர் பதவி வழங்கப்பட்டிருப்பதாகக் கூறி, இந்த நியமனங்களில் வெளிப்படைத்தன்மை இல்லை என்று விமர்சித்துள்ளார்.
அமைச்சர்கள் மீதான விமர்சனம்
அரசு நிர்வாகத்தில் இருக்கும் சில அமைச்சர்களின் செயல்பாடுகளைக் கடுமையாக விமர்சித்துள்ள தினகரன், போதைப்பொருள் பயன்பாடு தொடர்பான சர்ச்சைகளில் இருக்கும் அமைச்சர் மீது முதலமைச்சர் நடவடிக்கை எடுக்காதது ஏன் என்று கேள்வி எழுப்பியுள்ளார். மேலும், கரூரில் நடந்த துயர சம்பவம் தொடர்பாக சி.பி.ஐ விசாரணை நடைபெற்று வரும் சூழலில், காவல்துறை மற்றும் அதன் செயல்பாடுகளைக் கொச்சைப்படுத்தும் வகையில் சில அமைச்சர்கள் பேசியிருப்பதாகவும், அதனை முதலமைச்சர் கண்டும் காணாமல் இருப்பது மர்மமாக இருப்பதாகவும் அவர் பதிவிட்டுள்ளார்.
முதலமைச்சருக்குக் கோரிக்கை
குற்றவழக்குகளில் தொடர்புடையவர்களையும், லஞ்சப் பணம் கொடுத்தவர்களையும் அரசு வழக்கறிஞர்களாக நியமிப்பதன் மூலம், அரசு அவர்களைப் பாதுகாக்க முனல்விடுவதாகத் தெரிகிறது என்று அவர் குறிப்பிட்டுள்ளார். எனவே, அரசு வழக்கறிஞர் நியமனங்களில் ஏற்பட்டுள்ள குளறுபடிகளை நீக்கி, வெளிப்படையான முறையில் தகுதியான நபர்களை நியமிக்க வேண்டும் என்று வலியுறுத்தியுள்ளார்.
மேலும், இந்த நியமன முறைகேடுகளில் தொடர்புடையவர்கள் மீது முறையான விசாரணை மேற்கொண்டு, ஊழல் நடந்ததற்கான ஆதாரங்கள் இருக்கும் பட்சத்தில் உரிய நடவடிக்கை எடுக்க வேண்டும் என்றும் டிடிவி தினகரன் தனது பதிவில் கோரிக்கை விடுத்துள்ளார்.
Leave a Reply