இந்தியாவில் ஊழியர்களின் சமூகப் பாதுகாப்பை உறுதி செய்யும் நோக்கில், சுமார் 70 ஆண்டுகளுக்குப் பிறகு வருங்கால வைப்பு நிதி திட்டத்தில் மத்திய அரசு அதிரடி மாற்றங்களைக் கொண்டு வந்துள்ளது. 1952-ஆம் ஆண்டு நடைமுறைக்கு வந்த பழைய திட்டத்திற்குப் பதிலாக, சமூக பாதுகாப்புச் சட்டம் 2020-ன் கீழ் ‘ஊழியர் வருங்கால வைப்பு நிதி (EPF) திட்டம் 2026’ தற்போது அறிவிக்கப்பட்டுள்ளது.
கட்டாயப் பிடித்தத்தொகை வரம்பு
புதிய திட்டத்தின்படி, ஒரு ஊழியரின் அடிப்படைச் சம்பளம் எவ்வளவு அதிகமாக இருந்தாலும், மத்திய அரசு நிர்ணயித்துள்ள ரூ.15,000 என்ற வரம்பிற்கு மட்டுமே நிறுவனங்கள் 12 சதவிகிதம் கட்டாயப் பிடித்தம் செய்ய முடியும். இதன்படி, மாதந்தோறும் அதிகபட்சமாக ரூ.1,800 மட்டுமே கட்டாயப் பிடித்தத் தொகையாக இருக்கும்.
இந்தத் தொகையைத் தாண்டி, ஊழியர்கள் தங்கள் விருப்பத்தின் அடிப்படையில் கூடுதல் தொகையைச் செலுத்த முன்வந்தால், அது ‘விருப்பப் பங்களிப்பாக’ கருதப்படும். அதாவது, ரூ.1,800-க்கு மேல் பிடித்தம் செய்ய வேண்டுமானால், அதற்கு அந்த ஊழியரின் தெளிவான ஒப்புதல் அவசியமாகும்.
நிறுவனங்களின் பங்களிப்பு முறை
ஊழியர்கள் தங்கள் விருப்பப்படி ரூ.1,800-க்கு மேல் கூடுதல் தொகையைச் செலுத்தும்போது, அதே விகிதத்தில் நிறுவனங்களும் கூடுதல் தொகையைச் செலுத்த வேண்டும் என்ற கட்டாயம் இல்லை. நிறுவனங்கள் தங்களின் 12 சதவிகிதப் பங்களிப்பை அரசு நிர்ணயித்துள்ள வரம்பிற்கு உட்பட்டே வழங்கும்.
சம்பளப் பிடித்தத்தில் ஏற்படும் மாற்றங்கள்
இந்த புதிய நடைமுறை நடைமுறைக்கு வரும்போது, வெவ்வேறு சம்பளப் பிரிவுகளில் உள்ள ஊழியர்களுக்கு இது எவ்வாறு பாதிப்பை ஏற்படுத்தும் என்பதை உதாரணங்கள் மூலம் விளக்கலாம்.
ரூ.15,000 அடிப்படைச் சம்பளம் பெறுபவர்களுக்கு, வழக்கம்போல 12 சதவிகிதத் தொகையான ரூ.1,800 மட்டுமே பிடிக்கப்படும். எனவே, இவர்களுக்குப் பிடித்தத்தொகையில் எந்தவித மாற்றமும் ஏற்படாது.
ஆனால், ரூ.30,000 அடிப்படைச் சம்பளம் பெறுபவர்களுக்கு, இதுவரை 12 சதவிகித அடிப்படையில் ரூ.3,600 பிடித்தம் செய்யப்பட்டு வந்திருக்கலாம். புதிய விதிகளின்படி, அந்த ஊழியர் கூடுதல் தொகை செலுத்த விருப்பமில்லை என்று தெரிவித்தால், அவரது பிடித்தத்தொகை ரூ.1,800 ஆகக் குறைக்கப்படும். இதன் விளைவாக, அவரது கைக்கு கிடைக்கும் நிகரச் சம்பளம் அதிகரிக்கும்.
சுருக்கமாகக் கூறினால், ரூ.15,000 அல்லது அதற்கு மேல் சம்பளம் பெறுபவர்கள், ரூ.1,800-க்கு மேல் பிடித்தம் செய்ய விரும்பினால் மட்டுமே அந்த நடைமுறை தொடரும். இல்லையெனில், மீதத்தொகை அவர்களின் மாதச் சம்பளத்துடன் சேர்த்து வழங்கப்படும்.
Leave a Reply