பாலஸ்தீன விவகாரத்தில் இந்தியாவின் நிலைப்பாடு குறித்து விமர்சனம்
காசா பகுதியில் இஸ்ரேல் மேற்கொண்டு வரும் தாக்குதல்கள் மற்றும் பாலஸ்தீனிய மக்கள் எதிர்கொள்ளும் மனித உரிமை மீறல்கள் குறித்து இந்தியா மௌனம் காத்து வருவதாக காங்கிரஸ் மூத்த தலைவர் சோனியா காந்தி குற்றம் சாட்டியுள்ளார். இது தொடர்பாக அவர் ஒரு ஆங்கில நாளிதழில் எழுதியுள்ள விரிவான கட்டுரையில், மத்திய அரசின் தார்மீக நிலையை கடுமையாக விமர்சித்துள்ளார்.
காசாவில் இஸ்ரேல் நடத்தி வரும் தாக்குதல்களை இனப்படுகொலை என்று குறிப்பிட்ட அவர், ஆக்கிரமிக்கப்பட்ட மேற்குக் கரையில் லட்சக்கணக்கான பாலஸ்தீனிய குடும்பங்கள் இடம்பெயர்த்தப்படுவதையும், அவர்களின் உடைமைகளைப் பறிப்பதையும் மோடி அரசு கண்டுகொள்ளாமல் இருப்பதை தார்மீக ரீதியாக விளக்க முடியாது என்று குறிப்பிட்டுள்ளார்.
ஐக்கிய நாடுகள் சபையின் அறிக்கையும் பாதிப்புகளும்
ஐக்கிய நாடுகள் சபையின் சுதந்திரமான சர்வதேச விசாரணை ஆணையம் தாக்கல் செய்த 94 பக்கங்கள் கொண்ட அறிக்கையைச் சுட்டிக்காட்டிய சோனியா காந்தி, அதில் கூறப்பட்டுள்ள விவரங்கள் மனதை உலுக்கக்கூடியவை என்று தெரிவித்துள்ளார். காசாவில் உள்ள பாலஸ்தீனியர்களுக்கு எதிராக இஸ்ரேலிய அதிகாரிகள் திட்டமிட்டு செயல்பட்டு வருவதாகவும், குறிப்பாக குழந்தைகளைக் குறிவைத்து தாக்குதல்கள் நடத்தப்படுவதாகவும் அந்த அறிக்கையில் கூறப்பட்டுள்ளது.
குறைந்தது 20,000 குழந்தைகள் கொல்லப்பட்டுள்ளதாகவும், 44,000 பேர் காயமடைந்துள்ளனர் என்றும் அந்த அறிக்கையில் உள்ள தகவல்களை அவர் பகிர்ந்து கொண்டார். மேலும், காசாவில் உள்ள 97 சதவீத பள்ளிகள் மற்றும் மருத்துவமனைகள் உள்ளிட்ட சுகாதார உள்கட்டமைப்புகள் அழிக்கப்பட்டுள்ளன என்றும், இதன் காரணமாகப் பிரசவச் சிக்கல்கள் 300 சதவீதம் அதிகரித்துள்ளதாகவும் அவர் குறிப்பிட்டுள்ளார்.
சர்வதேச நாடுகளின் எதிர்வினை
ஹமாஸ் நடத்திய தாக்குதல்கள் ஏற்றுக்கொள்ள முடியாதவை என்றாலும், அதற்குப் பதிலடியாக இஸ்ரேலியப் படைகள் மேற்கொண்டு வரும் நடவடிக்கைகள் காட்டுமிராண்டித்தனமாக இருப்பதாக அவர் கூறியுள்ளார். அமெரிக்க அதிபர் டிரம்ப்பின் ஆதரவு இஸ்ரேலுக்கு ஊக்கமளித்திருந்தாலும், உலகின் பல நாடுகள் தற்போது பாலஸ்தீனத்தின் நலனுக்காகக் குரல் கொடுத்து வருவதாகக் குறிப்பிட்டுள்ளார்.
குறிப்பாக, பிரான்ஸ், இங்கிலாந்து, கனடா மற்றும் ஆஸ்திரேலியா போன்ற நாடுகள் பாலஸ்தீனத்தைத் தனி நாடாக அங்கீகரிக்க முன்வந்துள்ளதையும், தென் ஆப்பிரிக்கா இஸ்ரேலை சர்வதேச நீதிமன்றத்திற்கு இழுத்துள்ளதையும் அவர் சுட்டிக்காட்டினார். பல ஐரோப்பிய நாடுகள் ஆயுத விற்பனையைக் கட்டுப்படுத்தியுள்ள நிலையில், இந்தியா மட்டும் தனித்து மௌனம் காப்பது அதிர்ச்சியளிப்பதாகத் தெரிவித்துள்ளார்.
மூலோபாய முடிவுகள் குறித்த கேள்வி
இந்தச் சூழ்நிலையில் பிரதமர் மோடியின் இஸ்ரேல் பயணம் வரலாற்றில் ஒரு குழப்பமான மூலோபாய முடிவாகப் பதிவாகும் என்று சோனியா காந்தி விமர்சித்துள்ளார். பாலஸ்தீனம், ஈரான் மற்றும் மத்திய கிழக்கு நாடுகளுடன் இந்தியா கொண்டிருந்த வரலாற்று நட்புறவு இதனால் பாதிக்கப்பட்டுள்ளதாகக் கூறியுள்ளார்.
இந்தியா அனைத்து நாடுகளுடனும் நட்புறவைப் பேணும் ஒரு நாடாக இருந்தும், மத்தியஸ்தம் செய்யும் வாய்ப்பைத் தவறவிட்டு, பாகிஸ்தானுக்கே அந்த இடத்தைக் கொடுத்துவிட்டதாகக் குறிப்பிட்டுள்ளார். தார்மீக நலன்களையும் மூலோபாய நலன்களையும் விட்டுக்கொடுத்து, தனிப்பட்ட நட்புறவைத் தொடர்வது தேசிய நலனுக்கு உகந்தது அல்ல என்று தனது கட்டுரையில் அவர் நிறைவுத்துள்ளார்.
Leave a Reply