தமிழக அரசின் டெல்லி சிறப்பு பிரதிநிதியாக சினிமா தயாரிப்பாளர் கே.வெங்கட நாராயணாவை நியமித்திருப்பது பெரும் அரசியல் விவாதத்தை ஏற்படுத்தியுள்ளது. இந்த நியமனத்தை முன்னாள் அதிமுக அமைச்சர் டி.ஜெயக்குமார் தனது எக்ஸ் சமூக வலைதளப் பக்கத்தில் கடுமையாக விமர்சித்துள்ளார்.
தகுதியானவர்களை புறக்கணித்த அரசு
இது குறித்து டி.ஜெயக்குமார் பதிவிட்டுள்ளதாவது, “தமிழ்நாட்டிற்கு சம்பந்தமில்லாத ஒருவர் தமிழ்நாட்டின் பிரதிநிதியாக நியமிக்கப்பட்டுள்ளாரா? ஆட்சி அமைக்க அனுமதி கோரி ஆளுநர் மாளிகை சென்றபோதே தனது கடைசி படத்தின் தயாரிப்பாளரை அழைத்துச் சென்ற முதல்வர், தற்போது அவரை டெல்லி சிறப்பு பிரதிநிதியாக ஆக்கியுள்ளார். தமிழ்நாட்டைச் சார்ந்த தகுதியானவர்கள் பலர் இருக்கும் நிலையில், இந்த முக்கியப் பொறுப்பை ஒரு தயாரிப்பாளருக்கு வழங்கியதுதான் உங்கள் மாற்றமா?” என்று கேள்வி எழுப்பியுள்ளார்.
பிரச்சினைகளை அறிந்த பிரதிநிதி அவசியம்
மேலும் தனது பதிவில், “கேரள மருத்துவக் கழிவுகள் விவகாரம், கர்நாடகாவின் மேகதாது பிரச்சனை, மத்திய அரசின் கல்வி நிதி ஒதுக்கீடு போன்ற பல்வேறு சிக்கல்கள் இருக்கும் நிலையில், டெல்லி பிரதிநிதி என்பவர் முதல்வருக்கு நெருக்கமானவராக இருப்பதை விட, தமிழ்நாட்டின் நிலையை அறிந்தவராக இருப்பதே அவசியம்” என்று அவர் குறிப்பிட்டுள்ளார்.
டெல்லி சிறப்பு பிரதிநிதியின் பணிகள் என்ன?
மாநில அரசுக்கும் மத்திய அரசுக்கும் இடையே ஒரு பாலமாகவும், தகவல் பரிமாற்றத்திற்கான நம்பிக்கைக்குரிய நபராகவும் டெல்லி சிறப்பு பிரதிநிதி செயல்படுவார். பொதுவாக, இந்த பதவிக்கு முன்னாள் நாடாளுமன்ற உறுப்பினர்கள், சட்ட வல்லுநர்கள் அல்லது நிர்வாக அனுபவம் கொண்டவர்கள் நியமிக்கப்படுவார்கள். மத்திய அமைச்சகங்களுடன் தொடர்பு கொண்டு மாநிலத்திற்கான நிதி ஒதுக்கீடுகள் மற்றும் திட்ட அனுமதிகளை விரைவுபடுத்துவது இவர்களின் முக்கிய பணியாகும்.
மேலும், டெல்லியில் நடைபெறும் மத்திய அரசின் முக்கிய ஆலோசனைக் கூட்டங்கள் மற்றும் அதிகாரிகளின் சந்திப்புகளில் தமிழக அரசின் சார்பில் பங்கேற்று, மாநிலத்தின் கோரிக்கைகளை நேரடியாக மத்திய அரசின் கவனத்திற்கு கொண்டு செல்வதும் இவர்களின் கடமையாகும்.
நியமனத்தின் பின்னணி
தற்போதைய த.வெ.க ஆட்சியில், சினிமா தயாரிப்பாளரான கே.வெங்கட நாராயணாவை அரசு நியமித்துள்ளது. இவர் கர்நாடகாவைச் சேர்ந்தவர் என்பதும், அங்குள்ள முதல்வர் டி.கே.சிவகுமாருக்கு நெருக்கமானவர் என்பதும் குறிப்பிடத்தக்கது. விஜய் நடித்துள்ள “ஜனநாயகன்” திரைப்படத்தின் தயாரிப்பாளரான இவர், முதல்வர் விஜய் ஆளுநர் மாளிகைக்குச் சென்றபோது உடன் சென்றிருந்தார்.
இந்த பதவி தற்காலிகமாக உருவாக்கப்பட்டு, ஓராண்டு காலத்திற்கு அல்லது தேவைப்படும் வரையிலான காலத்திற்கு வழங்கப்பட்டுள்ளது. முன்னதாக ஜக்கையன், செல்வேந்திரன், தளவாய் சுந்தரம் மற்றும் ஏ.கே.எஸ்.விஜயன் போன்றவர்கள் இந்தப் பொறுப்பில் பணியாற்றியுள்ளனர். இந்நிலையில், ஒரு சினிமா தயாரிப்பாளரை இந்தப் பதவிக்கு நியமித்திருப்பது அரசியல் வட்டாரங்களில் பல்வேறு விவாதங்களை உருவாக்கியுள்ளது.
Leave a Reply