தமிழக அரசியலில் பெரும் விவாதத்தை ஏற்படுத்திய ஊழல் குற்றச்சாட்டுகள் தொடர்பான வழக்கான டி.ஆர். பாலு அவதூறு வழக்கின் விசாரணை, மீண்டும் சென்னை சைதாப்பேட்டை நீதிமன்றத்தில் நடைபெற உள்ளது. இந்த வழக்கில் எதிர்மனுதாரராக இருக்கும் பாஜக தலைவர் அண்ணாமலை, ஜூன் 30-ஆம் தேதி முன்னாள் மத்திய அமைச்சர் டி.ஆர். பாலுவிடம் மீண்டும் குறுக்கு விசாரணை செய்ய உள்ளார்.
வழக்கின் பின்னணி
பாஜக தமிழக மாநிலத் தலைவராகப் பணியாற்றிய அண்ணாமலை, கடந்த சில ஆண்டுகளுக்கு முன்பு திமுக அரசு மற்றும் அதன் நிர்வாகிகள் மீது பல்வேறு ஊழல் குற்றச்சாட்டுகளை முன்வைத்து ஒரு விரிவான பட்டியலை வெளியிட்டார். அந்தப் பட்டியலில், முன்னாள் மத்திய அமைச்சர் டி.ஆர். பாலுvிடம் கப்பல் கொள்முதல் செய்ததில் முறைகேடுகள் நடந்திருப்பதாகக் குறிப்பிட்டிருந்தார்.
தனது மீதான இந்தக் குற்றச்சாட்டு அடிப்படை ஆதாரமற்றது என்றும், தனது பெயருக்கும் புகழுக்கும் களங்கம் ஏற்படுத்தும் செயல் என்றும் கூறி, அண்ணாமலை மீது டி.ஆர். பாலு அவதூறு வழக்கை தொடர்ந்தார். இந்த வழக்கு சென்னை சைதாப்பேட்டை நீதிமன்றத்தில் விசாரணைக்கு எடுத்துக்கொள்ளப்பட்டு தற்போது நடைபெற்று வருகிறது.
முந்தைய விசாரணைகள்
இந்த வழக்கின் ஒரு பகுதியாக, கடந்த பிப்ரவரி மாதம் 26-ஆம் தேதி விசாரணை நடைபெற்றபோது, டி.ஆர். பாலுவிடம் அண்ணாமலை மற்றும் அவரது வழக்கறிஞர் தரப்பில் குறுக்கு விசாரணை மேற்கொள்ளப்பட்டது. அந்த விசாரணையின் போது பல்வேறு கேள்விகள் முன்வைக்கப்பட்டு, சாட்சியங்கள் பதிவு செய்யப்பட்டன.
அதன்பின்னர், சட்டசபை தேர்தல் பணிகள் மற்றும் இதர காரணங்களால் இந்த வழக்கின் விசாரணை தற்காலிகமாகத் தள்ளிப் போயிருந்தது. தற்போது நீதிமன்றத்தின் உத்தரவின்படி, ஜூன் 30-ஆம் தேதி மீண்டும் விசாரணைக்கு வரும் நிலையில், மீதமுள்ள குறுக்கு விசாரணை நடவடிக்கைகள் மேற்கொள்ளப்பட உள்ளன.
அரசியல் வட்டாரங்களில் பெரும் கவனத்தைப் பெற்றுள்ள இந்த வழக்கில், அண்ணாமலை முன்வைக்கும் கேள்விகள் மற்றும் டி.ஆர். பாலு அளிக்கும் பதில்கள் வழக்கின் போக்கை தீர்மானிக்கும் என்று எதிர்பார்க்கப்படுகிறது.
Leave a Reply