தூத்துக்குடி மாவட்டம் ஸ்ரீவைகுண்டம் பகுதியில் இளம்பெண் ஒருவர் கூட்டு பாலியல் வன்கொடுமைக்கு உள்ளாக்கப்பட்ட சம்பவம் குறித்து மார்க்சிஸ்ட் கம்யூனிஸ்ட் கட்சியின் தமிழ்நாடு மாநில செயற்குழு வன்மையாகக் கண்டனம் தெரிவித்துள்ளது.
குற்றச்சாட்டுகள் மற்றும் சம்பவம்
வேலை வாங்கித் தருவதாகக் கூறி இளம்பெண்ணை அழைத்துச் சென்றவர்கள், அவருக்கு மயக்க மருந்து கொடுத்து கூட்டு பாலியல் வன்கொடுமையில் ஈடுபட்டதாகக் கூறப்படுகிறது. இந்தச் செயலில் தமிழக வெற்றிக் கழகத்தைச் சேர்ந்த ஸ்ரீவைகுண்டம் பகுதி நிர்வாகிகள் பாலமுருகன் மற்றும் ஜெயபால் ஆகியோர் ஈடுபட்டதாகக் குற்றச்சாட்டு எழுந்துள்ளது.
குறிப்பாக, ஸ்ரீவைகுண்டம் சட்டமன்ற உறுப்பினர் வி.ஜி. சரணனின் பெயரைப் பயன்படுத்தி பெண்ணைக் காரில் கடத்திச் சென்று இந்த இழிவான செயலைச் செய்ததாகக் கூறப்பட்டுள்ளது. மேலும், இச்சம்பவத்தை வெளியில் சொன்னால் கொலை செய்து விடுவோம் என்று மிரட்டியதாகவும், புகார் அளிக்கக் கூடாது என சட்டமன்ற உறுப்பினர் வி.ஜி. சரணனும் மிரட்டியதாக அந்தப் பெண் ஊடகங்கள் வாயிலாகத் தெரிவித்துள்ளார்.
மார்க்சிஸ்ட் கட்சியின் வலியுறுத்தல்
இது தொடர்பாக மார்க்சிஸ்ட் கம்யூனிஸ்ட் கட்சியின் தமிழ்நாடு மாநில செயலாளர் பெ.சண்முகம் வெளியிட்டுள்ள அறிக்கையில், இந்த படுபாதகச் செயலை மாநில செயற்குழு வன்மையாகக் கண்டிக்கிறது என்று தெரிவித்துள்ளார். இவ்வழக்கில் இருவர் கைது செய்யப்பட்டுள்ள நிலையில், குற்றம் செய்தவர்கள் அரசியல் செல்வாக்கு மிக்கவர்கள் என்பதால், எந்தவிதமான அரசியல் தலையீடும் இன்றி சுதந்திரமான விசாரணை நடத்தப்பட வேண்டும் என்று தமிழக அரசை அவர் வலியுறுத்தியுள்ளார்.
பாதிக்கப்பட்ட பெண் முன்வைத்துள்ள அனைத்துக் குற்றச்சாட்டுகளையும் முறையாக விசாரணை செய்து, குற்றவாளிகள் யாராக இருந்தாலும் அவர்கள் மீது சட்டப்படியான கடுமையான நடவடிக்கைகளை மேற்கொள்ள வேண்டும் என்றும் அறிக்கையில் குறிப்பிடப்பட்டுள்ளது.
பாதுகாப்பு மற்றும் நிவாரணம்
பாதிக்கப்பட்ட பெண்ணுக்குத் தேவையான உரிய பாதுகாப்பையும், அரசு வழங்கி நிவாரணங்களையும், அரசு வேலைவாய்ப்பையும் வழங்க வேண்டும் என்று மார்க்சிஸ்ட் கம்யூனிஸ்ட் கட்சி கோரிக்கை விடுத்துள்ளது.
அதிகாரம், பதவி மற்றும் அரசியல் செல்வாக்கை பயன்படுத்திப் பெண்கள் மற்றும் குழந்தைகள் மீதான பாலியல் வன்கொடுமை சம்பவங்கள் அதிகரித்து வருவதைச் சுட்டிக்காட்டியுள்ள பெ.சண்முகம், இதனைத் தடுக்க தமிழ்நாடு அரசு விரைந்து நடவடிக்கை எடுத்து பெண்களின் பாதுகாப்பை உறுதி செய்ய வேண்டும் என்று வலியுறுத்தியுள்ளார்.
Leave a Reply