அதிமுக பொதுச்செயலாளரும் முன்னாள் முதல் அமைச்சருமான எடப்பாடி பழனிசாமி, நீண்ட காலமாகத் தங்கி வந்த சென்னை கிரீன்வேஸ் சாலை அரசு இல்லத்தை காலி செய்ய முடிவு செய்துள்ளார். கடந்த 2011-ஆம் ஆண்டு முதல் ‘செவ்வந்தி’ என்று அழைக்கப்படும் இந்த அரசு இல்லத்தில் அவர் வசித்து வந்தார்.
முன்னதாக எதிர்க்கட்சித் தலைவர் பொறுப்பில் இருந்த காரணத்தினால், அவர் தொடர்ந்து இந்த அரசு இல்லத்தில் தங்கியிருந்தார். இருப்பினும், சமீபத்தில் நடைபெற்ற சட்டமன்றத் தேர்தலுக்குப் பிறகு அரசியல் சூழல் மாறியதாலும், எதிர்க்கட்சித் தலைவர் அந்தஸ்து இல்லாததாலும், அரசு இல்லத்தை விட்டு வெளியேறுவதே முறை என்ற நோக்கில் இந்த முடிவு எடுக்கப்பட்டுள்ளது.
ராயப்பேட்டையில் புதிய இல்லம்
சென்னை ராயப்பேட்டையில் அமைந்துள்ள தனது புதிய வீட்டிற்கு எடப்பாடி பழனிசாமி இன்று குடிபெயர்கிறார். சுப முகூர்த்த நேரத்திற்கேற்ப, இன்று காலை ராயப்பேட்டை பகுதியில் உள்ள அந்தப் புதிய பங்களா வீட்டில் பால் காய்ச்சும் நிகழ்வு நடைபெற்றது. அதிமுக கட்சி அலுவலகத்திற்கு மிக அருகாமையில் உள்ள தெய்வசிகாமணி சாலையில் இந்த வீடு அமைந்துள்ளது.
இந்த புதிய வீடு ஒரு பிரபல தொழில் அதிபருக்குச் சொந்தமானது என்றும், அங்கு தற்காலிகமாக எடப்பாடி பழனிசாமி குடியேற உள்ளார் என்றும் அரசியல் வட்டாரங்களில் தகவல்கள் தெரிவிக்கின்றன. அரசு இல்லத்திலிருந்து வெளியேறித் தனது சொந்த அல்லது வாடகை இல்லத்திற்கு மாறுவது அரசியல் ரீதியாக ஒரு முக்கியமான நகர்வாகப் பார்க்கப்படுகிறது.
Leave a Reply