ராணிப்பேட்டை மாவட்டத்தில் செங்கல் சூளை உரிமையாளர்களிடம் மாதம் ஒரு லட்சம் ரூபாய் மாமூல் கேட்டு மிரட்டியதாக எழுந்த புகாரையடுத்து, தமிழக வெற்றிக் கழகத்தின் ஒன்றியச் செயலாளர் விஜயகுமாரை அனைத்துப் பொறுப்புகளிலிருந்தும் நீக்கி கட்சித் தலைமை உத்தரவிட்டுள்ளது.
நடந்தது என்ன?
வேலூர் மாவட்டம் கணியம்பாடி புதூர் கிராமத்தைச் சேர்ந்த சண்முகம், தினகரன், சுனில்குமார், ரமேஷ் மற்றும் சுமன் ஆகியோர் இப்பகுதியில் செங்கல் சூளை தொழில் செய்து வருகின்றனர். இந்நிலையில், கணியம்பாடி கிழக்கு ஒன்றியச் செயலாளர் விஜயகுமார் மற்றும் அவரது குழுவினர் லோகேஷ், ஈஸ்வரன் ஆகியோர் அந்தச் சூளை உரிமையாளர்களை அணுகி, மாதம் ஒரு லட்சம் ரூபாய் மாமூல் வழங்க வேண்டும் என்று மிரட்டியதாகப் புகார்கள் எழுந்தன.
இது தொடர்பாக கடந்த 22-ஆம் தேதி, விஜயகுமார் மற்றும் நிர்வாகிகள் செங்கல் சூளை பகுதிக்குச் சென்றபோது, உரிமையாளர்களுக்கும் ஆதரவாளர்களுக்கும் இடையே கடும் வாக்குவாதம் ஏற்பட்டது. இந்த மோதல் பின்னர் கைகலப்பாக மாறியது. இதனைத் தொடர்ந்து, பாதிக்கப்பட்ட உரிமையாளர்கள் வேலூர் தாலுகா காவல் நிலையத்தில் புகார் அளித்தனர்.
த.வெ.க நிர்வாகிகளின் தரப்பு விளக்கம்
மறுபுறம், த.வெ.க நிர்வாகிகள் இந்த புகாரை மறுத்துள்ளனர். அப்பகுதியில் அனுமதி இன்றி கனிம வளங்கள் கொள்ளையடிக்கப்படுவதாகவும், சட்டவிரோதமாக மண் எடுத்து வரும் லாரிகளை வீடியோ எடுத்து கனிம வளத்துறை அதிகாரிகளிடம் புகார் அளித்ததாகவும் அவர்கள் தெரிவித்துள்ளனர். அதிகாரிகளின் ஆய்வின் போது தடன்டன் எடுத்து எச்சரிக்கப்பட்ட லாரிகள் விவகாரத்தில், தங்களுக்குப் பழி சுமத்தப்படுவதாக விஜயகுமார் தரப்பு தரப்பில் கூறப்படுகிறது. இது தொடர்பாக வேலூர் மாவட்ட காவல் கண்காணிப்பாளர் அலுவலகத்தில் அவர்கள் புகார் அளித்துள்ளனர்.
கட்சித் தலைமையின் அதிரடி நடவடிக்கை
இரு தரப்பு புகார்கள் மற்றும் போலீஸ் விசாரணைக்குப் பிறகு, கட்சியின் பெயருக்குக் களங்கம் ஏற்படும் என்பதால் விஜயகுமாரை அடிப்படை உறுப்பினர் உள்ளிட்ட அனைத்துப் பொறுப்புகளிலிருந்தும் நீக்க த.வெ.க தலைமை முடிவு செய்துள்ளது.
அரசு விவகாரங்களில் கட்சியின் நிர்வாகிகள் தலையிடக் கூடாது என்றும், தங்களின் எல்லைகளை உணர்ந்து செயல்பட வேண்டும் என்றும் கட்சித் தலைமை அறிவுறுத்தியுள்ளது. மக்கள் பிரதிநிதிகள் அல்லாதவர்கள் அரசு அலுவலகங்கள் அல்லது ஆய்வுகளில் ஈடுபடக் கூடாது என்றும், பொதுமக்களுக்கும் அதிகாரிகளுக்கும் இடையூறு விளைவிக்கும் வகையில் கட்சிப் பதவிகளைப் பயன்படுத்தித் தன்னிச்சையாகச் செயல்படுபவர்கள் மீது கடும் நடவடிக்கை எடுக்கப்படும் என்றும் தெரிவிக்கப்பட்டுள்ளது.
Leave a Reply