தமிழக அரசியல் சூழலில் பெரும் மாற்றங்களை ஏற்படுத்தியுள்ள நிலையில், மதுராந்தகம், பெருந்துறை மற்றும் தாராபுரம் ஆகிய மூன்று சட்டமன்றத் தொகுதிகள் தற்போது காலி என அரசிதழில் அறிவிக்கப்பட்டுள்ளது. அதிமுக சார்பில் வெற்றி பெற்று சட்டமன்ற உறுப்பினர்களாக இருந்த மூவர் ராஜினாமா செய்ததை அடுத்து இந்த நடவடிக்கை எடுக்கப்பட்டுள்ளது.
ராஜினாமா பின்னணி
சமீபத்தில் நடைபெற்ற சட்டமன்றத் தேர்தலுக்குப் பிறகு, தமிழகத்தில் தவெக தலைமையிலான அரசு அமைக்கப்பட்டது. அப்போது அதிமுகவில் பிளவு ஏற்பட்டு, முன்னாள் அமைச்சர் எஸ்.பி.வேலுமணி தலைமையிலான ஒரு குழு தவெக அரசுக்கு ஆதரவு தெரிவித்தது. இந்த அரசியல் நகர்வுகளின் தொடர்ச்சியாகவே தற்போது மூன்று சட்டமன்ற உறுப்பினர்கள் தங்கள் பதவிகளைத் துறணித்துள்ளனர்.
நேற்று மதியம் சட்டமன்ற வளாகத்திற்கு வந்த தாராபுரம் தொகுதி உறுப்பினர் சத்தியபாமா, மதுராந்தகம் தொகுதி உறுப்பினர் மரகதம் குமரவேல் மற்றும் பெருந்துறை தொகுதி உறுப்பினர் ஜெயக்குமார் ஆகியோர் சபாநாயகர் ஜே.சி.டி. பிரபாகரை நேரில் சந்தித்துத் தங்கள் ராஜினாமா கடிதங்களைச் சமர்ப்பித்தனர். சபாநாயகர் இந்தக் கடிதங்களை உடனடியாக ஏற்றுக்கொண்டதைத் தொடர்ந்து, அந்த மூன்று தொகுதிகளும் காலியானதாக அதிகாரப்பூர்வ அறிவிப்பு வெளியானது.
தவெக கட்சியில் இணைந்த உறுப்பினர்கள்
சபாநாயகரிடம் ராஜினாமா கடிதத்தை வழங்கிய உடனேயே, அவர்கள் தலைமைச்செயலக வளாகத்தில் பொதுப்பணித்துறை அமைச்சர் ஆதவ் அர்ஜுனாவைச் சந்தித்தனர். அமைச்சருக்கு சால்வை அணிவித்த அவர்கள், தங்களை தவெக கட்சியில் இணைத்துக் கொண்டனர். பதிலுக்கு அமைச்சர் ஆதவ் அர்ஜுனா அவர்களுக்குப் பொன்னாடை போர்த்தி வரவேற்றார்.
அதிமுக தரப்பு எதிர்ப்பு
இந்த ராஜினாமா நடவடிக்கைக்கு அதிமுகவின் எடப்பாடி பழனிசாமி தரப்பு கடும் எதிர்ப்பு தெரிவித்து வருகிறது. குறிப்பாக, அதிமுக எம்எல்ஏக்கள் அக்ரி கிருஷ்ணமூர்த்தி, தளவாய் சுந்தரம் மற்றும் இன்பதுரை ஆகியோர் சபாநாயகரை அணுகி, இந்த ராஜினாமாவை ஏற்கக் கூடாது என்று வலியுறுத்தினர்.
கட்சித் தலைமை மற்றும் கொறடா உத்தரவை மீறி வாக்களித்த காரணத்தால், இந்த உறுப்பினர்களின் ராஜினாமாவிற்கு அனுமதி வழங்கக் கூடாது என்று அவர்கள் கோரிக்கை வைத்தனர். மேலும், கட்சி உத்தரவை மீறியது தொடர்பான மனுவின் மீது நடவடிக்கை எடுக்காமல், ராஜினாமா முடிவை சபாநாயகர் எவ்வாறு ஏற்க முடியும் என்றும் அவர்கள் கேள்வி எழுப்பியுள்ளனர்.
தற்போதைய நிலையில், அரசிதழில் அறிவிப்பு வெளியானதைத் தொடர்ந்து, இந்த மூன்று தொகுதிகளிலும் இடைத்தேர்தல் நடத்துவதற்கான நடவடிக்கைகள் மேற்கொள்ளப்பட வாய்ப்புள்ளதாகக் கருதப்படுகிறது.
Leave a Reply