பாகிஸ்தானின் குவெட்டா பகுதியில் இயங்கி வந்த ஜாபர் எக்ஸ்பிரஸ் ரயிலை இலக்காகக் கொண்டு நடத்தப்பட்ட தற்கொலைப்படை தாக்குதலில் 30 பேர் உயிரிழந்தனர். இந்த கோரத் தாக்குதலில் 50-க்கும் மேற்பட்ட பயணிகள் மற்றும் பொதுமக்கள் பலத்த காயமடைந்துள்ளனர்.
தகவலின்படி, ரயில் தண்டவாளத்திற்கு மிக அருகாமையில் சக்திவாய்ந்த வெடிகுண்டு வெடித்தது. இந்த வெடிப்பினால் ரயிலின் ஒரு பெட்டி முழுமையாகச் சிதைந்து நொறுங்கியது. வெடிப்பின் அதிர்வினால் ரயில் தடம் புரண்டதுடன், அந்தப் பகுதியில் பெரும் தீ விபத்தும் ஏற்பட்டது. ரயிலுக்கு அருகாமையில் இருந்த வீடுகள் மற்றும் வாகனங்களும் இந்த தாக்குதலால் கடுமையாகப் பாதிக்கப்பட்டுள்ளன.
தாக்குதலுக்கு பி.எல்.ஏ பொறுப்பு
இந்தத் தற்கொலைப்படை தாக்குதலுக்குப் பலூச் விடுதலை ராணுவம் (BLA) என்ற தடைசெய்யப்பட்ட அமைப்பு பொறுப்பேற்றுள்ளது. குவெட்டா கண்டோன்மென்ட் பகுதியில் இருந்து ரயிலில் பயணம் செய்த பாகிஸ்தான் ராணுவ வீரர்களைக் குறிவைத்து இந்தத் திட்டம் தீட்டப்பட்டதாக அந்த அமைப்பு தெரிவித்துள்ளது.
தீவிரமான மீட்புப் பணிகள்
சம்பவம் நடந்த இடத்திற்குத் விரைந்து வந்த மீட்புப் படையினர், சிதைந்த ரயில் பெட்டிகளுக்குள் சிக்கியவர்களை மீட்டு வருகின்றனர். காயமடைந்தவர்கள் சிகிச்சைக்காக அருகிலுள்ள மருத்துவமனைகளில் அனுமதிக்கப்பட்டுள்ளனர். பல இடங்களில் உயிரிழப்புகள் இன்னும் அதிகமாக இருக்கலாம் என்று அஞ்சப்படுகிறது.
பாதுகாப்புப் படையினர் தாக்குதல் நடந்த பகுதியில் தீவிர தேடுதல் வேட்டையில் ஈடுபட்டுள்ளனர். ரயில் போக்குவரத்து தற்காலிகமாக நிறுத்தப்பட்டு, தடைகளை நீக்கும் பணிகள் மேற்கொள்ளப்பட்டு வருகின்றன.
Leave a Reply