கம்யூனிச நாடான கியூபாவுக்கும் அமெரிக்காவிற்கும் இடையிலான நீண்டகால அரசியல் மோதல்கள் மீண்டும் தீவிரமடைந்துள்ளன. 1996-ஆம் ஆண்டு நிகழ்ந்த விமானதாக்குதல் வழக்கில், கியூபாவின் முன்னாள் அதிபர் ரவுல் காஸ்ட்ரோ உள்ளிட்ட அதிகாரிகள் மீது அமெரிக்க அரசு நீதிமன்றத்தில் குற்றப்பத்திரிகையைத் தாக்கல் செய்துள்ளது.
1996-ஆம் ஆண்டு விமானதாக்குதல் பின்னணி
கடந்த 1996-இல், புளோரிடா மற்றும் கியூபா பகுதிகளுக்கு இடையே பயணித்த இரண்டு சிவிலியன் விமானங்கள் கியூபா ராணுவத்தால் சுட்டு வீழ்த்தப்பட்டன. இந்தத் தாக்குதலில் மூன்று அமெரிக்கர்கள் உட்பட மொத்தம் நான்கு பேர் உயிரிழந்தனர். இந்தச் சம்பவம் அப்போதே இரு நாடுகளுக்கும் இடையே பெரும் பதற்றத்தை உருவாக்கியது.
அந்தச் சம்பவம் நடந்த சமயத்தில் கியூபாவின் பாதுகாப்புத்துறை அமைச்சராக ரவுல் காஸ்ட்ரோ பதவி வகித்து வந்தார். அந்தப் பொறுப்பில் இருந்த அவர், இந்தத் தாக்குதலுக்குக் காரணமாக இருந்ததாக அமெரிக்க அரசு குற்றம் சாட்டியுள்ளது. சுமார் 30 ஆண்டுகளுக்குப் பிறகு, தற்போது அவர் மீது சட்டப்பூர்வமான நடவடிக்கைகள் மேற்கொள்ளப்பட்டுள்ளன.
நீதிமன்ற நடவடிக்கை மற்றும் கைது வாரண்ட்
ரவுல் காஸ்ட்ரோ மற்றும் அவருடன் ஐந்து கியூபா உயர் அதிகாரிகள் மீதும் அமெரிக்க ஃபெடரல் வழக்கறிஞர்கள் குற்றப்பத்திரிகையைத் தாக்கல் செய்துள்ளனர். இது குறித்து அமெரிக்க அட்டர்னி ஜெனரல் டோட் பிளான்ச் அதிகாரப்பூர்வமாக அறிவித்துள்ளார். மேலும், ரவுல் காஸ்ட்ரோவை கைது செய்ய நீதிமன்ற வாரண்ட் பிறப்பிக்கப்பட்டுள்ளதாகவும் அவர் தெரிவித்துள்ளார்.
பிடல் காஸ்ட்ரோவின் மறைவுக்குப் பிறகு 2006-ஆம் ஆண்டு அதிபராகப் பொறுப்பேற்ற ரவுல் காஸ்ட்ரோ, 2018 வரை அந்தப் பதவியில் இருந்தார். தற்போது 94 வயதாகும் அவர் அரசியலில் இருந்து ஓய்வு பெற்றிருந்தாலும், கியூபாவின் செல்வாக்கு மிக்க தலைவராகத் தொடர்ந்து நீடுகிறார்.
கியூபாவின் எதிர்வினை மற்றும் தற்போதைய சூழல்
அமெரிக்காவின் இந்த நடவடிக்கை திட்டமிட்ட அரசியல் சூழ்ச்சி என்று கியூபா அதிபர் மிகுவொல் டயஸ் கனெல் கடுமையாகக் குற்றம் சாட்டியுள்ளார். கடந்த ஜனவரி மாதம் வெனிசுலா அதிபர் நிக்கோலஸ் மதுரோ மீது அமெரிக்கா சுமத்திய குற்றச்சாட்டுகளைத் தொடர்ந்து, தற்போது கியூபா மீதும் இதேபோன்ற அழுத்தம் கொடுக்கப்படுவதாகக் கருதப்படுகிறது.
ஏற்கனவே அமெரிக்காவின் கடுமையான பொருளாதாரத் தடைகளால் கியூபா நாடு பெரும் நெருக்கடியைச் சந்தித்து வருகிறது. மின்சாரத் தட்டுப்பாடு மற்றும் உணவுப் பற்றாக்குறையால் மக்கள் அவதிப்படும் சூழலில், இந்த சட்டப்பூர்வ மோதல் அந்நாட்டு அரசுக்கு மேலும் கூடுதல் அழுத்தத்தை ஏற்படுத்தியுள்ளது.
Leave a Reply