சென்னை தலைமைச் செயலகத்தில் இன்று மருத்துவம் மற்றும் ஊரகநலப்பணிகள் இயக்ககத்தின் பயன்பாட்டிற்காக 2.90 கோடி ரூபாய் மதிப்பீட்டில் 40 புதிய வாகனங்கள் வழங்கும் விழா நடைபெற்றது. இந்த விழாவில் கலந்துகொண்ட முதல்வர் விஜய், புதிய வாகனங்களுக்கான சாவிகளை அதிகாரிகளுக்கு வழங்கியதோடு, ஒரு வாகனத்தை இயக்கி பயன்பாட்டிற்குத் தொடங்கி வைத்தார்.
கண்காணிப்பு பணிகளுக்கான முக்கியத்துவம்
மாவட்டங்களில் உள்ள அரசு மற்றும் தனியார் மருத்துவமனைகளில் இயங்கும் ஸ்கேன் மையங்களில், கருவுறுதலுக்கு முன்னும் பின்னும் பாலினத் தேர்வு தடைச்சட்டம் 1994 மற்றும் தமிழ்நாடு மருத்துவ நிறுவனங்கள் முறைப்படுத்துதல் சட்டம் 1997 ஆகிய சட்ட விதிகள் முறையாகப் பின்பற்றப்படுகிறதா என்பதை ஆய்வு செய்ய இந்த வாகனங்கள் பயன்படுத்தப்பட உள்ளன.
மேலும், மருத்துவ மையங்கள் முறையாகப் பதிவு செய்யப்பட்டு இயக்கப்படுகிறதா என்பதைக் கண்காணிப்பதும், சட்டவிரோதச் செயல்பாடுகளைக் களைவதும் இந்த நடவடிக்கையின் முக்கிய நோக்கமாகும்.
பேரிடர் கால பாதுகாப்பு மற்றும் போலி மருத்துவர் தடுப்பு
திடீரென ஏற்படும் பேரிடர்கள் மற்றும் பெருந்தொற்றுக் காலங்களில் பொதுமக்களுக்குத் தேவையான அவசர மருத்துவப் பாதுகாப்புப் பணிகளை விரைவாக மேற்கொள்ள இந்த வாகனங்கள் பேருதவியாக இருக்கும். அரசு மற்றும் தனியார் மருத்துவமனைகளில் நோயாளிகளுக்கு உரிய சிகிச்சைகள் வழங்கப்படுகிறதா என்பதைக் கண்காணிக்கும் பணியும் இதன் மூலம் மேம்படுத்தப்படும்.
குறிப்பாக, போலி மருத்துவர்கள் பெயரில் சிகிச்சை அளிப்பவர்களைக் கண்டறிந்து, அவர்கள் மீது விரைந்து விசாரணை மேற்கொண்டு சட்டப்படி உரிய நடவடிக்கை எடுக்க இந்த புதிய வாகனங்கள் வழிவகை செய்யும் என்று தெரிவிக்கப்பட்டுள்ளது.
Leave a Reply