ஸ்பெயினின் அண்டலூசியா பகுதியில் உள்ள செவில் நகரில் நடைபெற்ற வார கால கண்காட்சியில் பயங்கர விபத்து ஏற்பட்டது. திரில்லிங்கான சவாரியான ‘ஸ்லிங்ஷாட் ரைடு’ இயங்கிக்கொண்டிருந்தபோது திடீரென ரோப் அறுந்து விபத்து ஏற்பட்டது. இதில் சவாரியில் இருந்த இரண்டு சிறுவர்கள் உட்பட 4 பேர் பலத்த காயமடைந்தனர்.
விபத்து நிகழ்ந்த விதம்
கடந்த இரு தினங்களுக்கு முன்பு இந்த சவாரி இயங்கிக்கொண்டிருந்தபோது இரண்டு சிறுவர்கள் அதில் அமர்ந்து மகிழ்ந்தனர். மேலே சென்று சுழன்றுகொண்டிருந்தபோது இடதுபுறம் இருந்த ரோப் திடீரென அறுந்தது. இதனால் சிறுவர்கள் அமர்ந்திருந்த பெட்டி சுமார் தொண்ணூறு மீட்டர் உயரத்திலிருந்து வேகமாக தரையை நோக்கி பாய்ந்தது.
கீழே வரும்போது பக்கவாட்டில் இருந்த கம்பம் மீது தாறுமாறாக மோதியது. இந்த சம்பவத்தில் பெட்டியில் இருந்த 2 குழந்தைகளுக்கு பலத்த காயம் ஏற்பட்டது. மேலும், ஸ்லிங்ஷாட் பெட்டி விழுந்த இடத்தில் நின்றுகொண்டிருந்த 2 பேரும் பலத்த காயமடைந்தனர்.
பொதுமக்கள் அதிர்ச்சி
இந்த சம்பவம் நிகழும்போது அங்கிருந்த மக்கள் பதறி துடித்தனர். கண்காட்சிக்கு வந்திருந்தவர்கள் கூச்சலிட்டனர். உடனடியாக மீட்புப் பணிகள் தொடங்கப்பட்டன. காயமடைந்த நான்கு பேரும் அருகில் உள்ள மருத்துவமனையில் அனுமதிக்கப்பட்டுள்ளனர். அவர்களின் நிலைமை கவலைக்கிடமாக இருப்பதாக மருத்துவமனை வட்டாரங்கள் தெரிவித்தன.
அதிகாரிகள் விசாரணை
இந்த விபத்து தொடர்பாக உள்ளூர் அதிகாரிகள் விசாரணை தொடங்கியுள்ளனர். சவாரியில் பராமரிப்பு குறைபாடு இருந்ததா, பாதுகாப்பு விதிகள் மீறப்பட்டனவா என்பது குறித்து ஆய்வு செய்யப்பட்டு வருகிறது. கண்காட்சி நடத்துனர்கள் மீது நடவடிக்கை எடுக்கப்படும் என அதிகாரிகள் தெரிவித்தனர்.
Leave a Reply