தனுஷ், மமிதா பைஜூ, ஜெயராம், கருணாஸ் உள்பட பலர் நடித்து விக்னேஷ் ராஜா இயக்கியுள்ள படம் ‘கர’. ஏப்ரல் 30ம் தேதி இப்படம் வெளியாகவுள்ளது. படப்பிடிப்பு தொடர்பான பேட்டிகளை படக்குழு அளித்து வருகிற நிலையில், சமீபத்தில் மமிதா பைஜூ பேசியுள்ளார்.
மமிதாவின் அனுபவம்
இது குறித்து பேசிய மமிதா பைஜூ, தனுஷ் மிக கடினமான உழைப்பாளி என்றும் மிகுந்த பேரார்வத்துடன் சினிமாவை அணுகுகிறார் என்றும் கூறினார். “முழுநாள் வேலை செய்கிறோம் என சோர்வாகிறது என்றெல்லாம் சொல்லக்கூடாது. அவரை பார்த்து கற்றுக்கொள்ள வேண்டும் என நினைப்பேன்” என்றார்.
தனுஷுக்கு கொடுக்கப்படும் கதாபாத்திரத்திற்கு அவர் மிகவும் உண்மையாக இருக்கிறார். அந்த பாத்திரத்தை எடுத்துக்கொண்டு அதனை மேம்படுத்த வேலை செய்கிறார். அதை எல்லாம் கவனிக்கையில் நிறைய கற்றுக்கொள்ள முடிகிறது என்று மமிதா தெரிவித்தார்.
நடிப்பில் பிரமிப்பு
“ஒரு காட்சியில் எனக்கு பின்னால் கேமரா இருக்கிறது. அவர் நடிக்கும் காட்சி எடுக்கப்பட்டது. அவர் நடிப்பதை பார்த்து நான் என்னையே மறந்துவிட்டேன்” என்று மமிதா நினைவு கூர்ந்தார்.
“பொதுவாக நான் அப்படி ஆகும் நபர் கிடையாது. இப்படித்தான் செய்யப்போகிறார் என நாம் நினைக்கும்போது, இதனை இப்படியும் செய்ய முடியுமா என்பதை போல நடிப்பார்” என்று தனுஷின் நடிப்புத் திறமையை பாராட்டினார்.
Leave a Reply