234 தொகுதிகளை கொண்ட தமிழக சட்டசபைக்கு நேற்று தேர்தல் நடைபெற்று முடிந்தது. காலை 7 மணிக்கு தொடங்கிய தேர்தல் மாலை 6 மணிக்கு நிறைவடைந்தது. தேர்தலில் மொத்தம் 4 ஆயிரத்து 23 வேட்பாளர்கள் களமிறங்கினர். தேர்தலுக்காக தமிழகம் முழுவதும் 75 ஆயிரத்து 64 வாக்குச்சாவடிகள் அமைக்கப்பட்டன. தமிழக சட்டசபை தேர்தலில் 85.15 சதவீத வாக்குகள் பதிவாகியுள்ளதாக தேர்தல் ஆனையம் தெரிவித்துள்ளது.
வாக்குப்பதிவு சதவீதம் அதிகரிப்பு
சென்னை மாவட்டத்தில் 2016, 2021 தேர்தல்களை விட அதிகமாக 83.7% வாக்குகள் பதிவானாலும், எண்ணிக்கை அடிப்படையில் இரு தேர்தல்களை விட குறைவான வாக்காளர்களே வாக்களித்துள்ளனர். இந்த தகவல் தேர்தல் ஆணையத்தின் புள்ளிவிவரங்களில் இருந்து தெரியவருகிறது.
முந்தைய தேர்தல்களுடன் ஒப்பீடு
2016-ம் ஆண்டு 39.75 லட்சம் என இருந்த மொத்த வாக்காளர்களில் 24.33 லட்சம் வாக்குகள் பதிவாகி இருந்தது. இதன் சதவீதம் 61.2 ஆகும். 2021-ம் ஆண்டு 40.04 லட்சம் என இருந்த மொத்த வாக்காளர்களில் 24.16 லட்சம் வாக்குகள் பதிவாகி இருந்தது. இதன் சதவீதம் 60 ஆகும். 2026-ம் ஆண்டு சிறப்பு தீவிர திருத்தத்திற்கு (SIR) பிறகு 28.30 லட்சம் என இருந்த மொத்த வாக்காளர்களில் 23.69 லட்சம் வாக்குகள் பதிவாகி இருந்தது. இதன் சதவீதம் 83.7 ஆகும்.
என்ன காரணம்?
சென்னை மாவட்டத்தில் வாக்காளர் பட்டியல் திருத்தத்தால் மொத்த வாக்காளர்கள் எண்ணிக்கை கணிசமாக குறைந்துள்ளது. 2026-ம் ஆண்டு நடைபெற்ற சிறப்பு தீவிர திருத்தத்தில் (SIR) பல போலி வாக்காளர்கள் நீக்கப்பட்டனர். இதனால் 2016-ல் இருந்த 39.75 லட்சம் வாக்காளர்கள் 2026-ல் 28.30 லட்சமாக குறைந்தனர். ஆனால் புதிய பட்டியலில் உள்ள வாக்காளர்கள் தீவிரமாக வாக்களித்ததால் சதவீதம் அதிகரித்துள்ளது.
Leave a Reply