வாஷிங்டன்: அதிபர் டிரம்ப் கலந்து கொண்ட விருந்தில் துப்பாக்கிச்சூடு நடந்த நிலையில், அனைவரும் பதுங்கிய நேரத்தில் ஒருவர் மட்டும் அமைதியாக சாலட் சாப்பிட்ட வீடியோ வைரலாகியுள்ளது.
விருந்தில் பதற்றம்
1921 ஆம் ஆண்டு முதல் வெள்ளை மாளிகை செய்தியாளர்கள் சங்கம் சார்பில் ஆண்டுதோறும் விருந்து நிகழ்ச்சி நடத்தப்படுகிறது. இந்த நிகழ்ச்சியில் சிறந்த பத்திரிகையாளர்களுக்கு விருதுகள் வழங்கப்படுவது வழக்கம். வாஷிங்டனில் உள்ள ஹில்டன் நட்சத்திர விடுதியின் தரைதள அரங்கில் நேற்று இந்த விருந்து நிகழ்ச்சி நடந்தது. இதில் அமெரிக்க அதிபர் டிரம்ப், துணை அதிபர் வான்ஸ் உள்ளிட்ட பலர் பங்கேற்றிருந்தனர்.
துப்பாக்கிச்சூட்டின் போது நடந்தது
விருந்தினர்களுக்கு உணவு உபசரிப்பு நடந்து கொண்டிருந்தபோது, அரங்கிற்கு வெளியே பாதுகாப்பு சோதனைகள் நடைபெறும் பகுதிக்கு அருகே ஒருவர் ஓடி வந்து துப்பாக்கிச்சூடு நடத்தினார். ஐந்து அல்லது ஆறு முறை குண்டுகள் வெடிக்கும் சத்தம் கேட்டதாக தகவல்கள் தெரிவிக்கின்றன. துப்பாக்கிச்சூடு சத்தத்தை கேட்டதும் அரங்கினுள் இருந்தவர்கள் மேஜை, நாற்காலிகளுக்கு அடியில் பதுங்கினர். அதிபர் டிரம்பும், அவரது மனைவி மெலானியாவும் மேடையில் பதுங்கினர். உடனடியாக அமெரிக்க ரகசிய பாதுகாப்பு படையினர் அவர்களை பாதுகாப்பான இடத்திற்கு அழைத்துச் சென்றனர்.
அசராமல் சாலட் சாப்பிட்டவர்
இந்த பதைபதைக்கும் வினாடிகள் சமூக வலைதளங்களில் வீடியோ காட்சிகளாக வெளியாகியுள்ளன. அந்த வீடியோவில் அந்த இடத்தில் இவ்வளவு களேபரம் நடக்கையில் ஒருவர் மட்டும் அமர்ந்து எந்த பரபரப்பும் இல்லாமல் சாலட் சாப்பிட்டுக்கொண்டிருந்தார். உயிருக்கு அஞ்சாமல் சாப்பிட்டது பலரின் கவனத்தை ஈர்த்தது.
சாப்பிட்டதற்கான காரணம் என்ன?
இந்நிலையில், மைக்கேல் கிளான்ஸ் என்ற அந்த கலைஞர் தான் அப்படி சாலட் சாப்பிட்டதற்கான காரணத்தை விளக்கியுள்ளார். “நியூயார்க்கில் பிறந்து வளர்ந்ததால் எதற்கும் பயப்பட மாட்டேன். அந்த இடத்தில் ஏராளமான பாதுகாப்பு படையினர் இருந்ததால் பாதுகாப்பாக உணர்ந்தேன். எனவே இடத்தை விட்டு வெளியேற வேண்டும் என கருதவில்லை. மேலும் எனக்கு முதுகு வலி இருந்தது, தரையில் படுக்க முடியாது. அழுக்கு தரையில் புதிய ஆடையுடன் படுப்பதற்கு நான் தயாராக இல்லை”, என்று கூறினார்.
சமூக ஊடகங்களில் வைரல்
இந்த சம்பவத்தின் வீடியோ சமூக ஊடகங்களில் வைரலாகி வருகிறது. இந்த நிகழ்வு அதிபர் டிரம்பின் பாதுகாப்பு மற்றும் விருந்தினர் நடத்தை குறித்து பல கேள்விகளை எழுப்பியுள்ளது. இந்த சம்பவம் குறித்து மேலும் விசாரணை நடைபெற்று வருகிறது.