தெலுங்கானா மாநிலம் ஐதராபாத் மாநகரில், பண்ணை வீட்டில் பாம்பைப் பிடித்து விளையாடிய தொழிலதிபர் ஒருவர் சிகிச்சை பலனின்றி உயிரிழந்த சம்பவம் பெரும் சோகத்தை ஏற்படுத்தியுள்ளது.
ராஜேந்திர நகர் காத்ரி ஹில்ஸ் பகுதியில் வசித்து வந்தவர் நவாப் மைதீன் ஹுசைனி (30). இவர் அப்பகுதியில் தொழிலதிபராக அறியப்பட்டவர். கடந்த வார இறுதியில், மொயினாபாத் பகுதியில் உள்ள தனது பண்ணை வீட்டிற்கு நண்பர்களுடன் சென்றிருந்தார்.
விளையாட்டாக செய்த செயல் விபரீதமானது
நேற்று அதிகாலை சுமார் 3 மணி அளவில், பண்ணை வீட்டிற்குள் ஒரு சிறிய பாம்பு புகுந்து வந்திருந்தது. இதைக் கண்ட மைதீன் ஹுசைனி, அந்தப் பாம்பை தனது கையில் பிடித்து, அருகில் இருந்த நண்பர்களை விளையாட்டுக்காக பயமுறுத்த முயன்றார். அப்போது அந்தப் பாம்பு திடீரென அவரது வலது கை கட்டைவிரலில் கடித்தது.
பாம்பு கடித்ததைக் கண்ட நண்பர்கள், உடனடியாக மருத்துவமனைக்குச் செல்லுமாறு அவரை வலியுறுத்தினர். இருப்பினும், தனக்கு பாதிப்பு ஏதுமில்லை என்று அலட்சியமாக இருந்ததாகக் கூறப்படுகிறது. ஆனால், ஒரு மணி நேரத்திற்குப் பிறகு அவரது உடல்நிலையில் திடீர் மாற்றம் ஏற்பட்டு, சுவாசக் கோளாறுகள் ஏற்பட்டதையடுத்து அவசரமாகத் தனியார் மருத்துவமனையில் அனுமதிக்கப்பட்டார்.
சிகிச்சை பலனின்றி உயிரிழப்பு
தனியார் மருத்துவமனையில் முதலுதவி அளிக்கப்பட்ட போதிலும், அவரது நிலைமை கவலைக்கிடமாக மாறியது. இதனால் மேல் சிகிச்சைக்காக அவர் ஐதராபாத்தின் புகழ்பெற்ற உஸ்மானியா மருத்துவமனைக்கு மாற்றப்பட்டார். அங்கு தீவிர சிகிச்சை அளிக்கப்பட்டும், பாம்பு விஷம் இரத்தத்தில் கலந்ததால் சிகிச்சை பலனின்றி அவர் உயிரிழந்ததாக மருத்துவர்கள் தெரிவித்தனர்.
உயிரிழந்த நவாப் மைதீன் ஹுசைனிக்கு மனைவி மற்றும் மூன்று குழந்தைகள் உள்ளனர். இளம் வயதிலேயே தொழிலதிபர் உயிரிழந்த சம்பவம் அவரது குடும்பத்தினரிடையே பெரும் அதிர்ச்சியை ஏற்படுத்தியுள்ளது.