சென்னை எழும்பூரில் அமைந்துள்ள டாஸ்மாக் தலைமை அலுவலக வளாகத்தில், காலி மதுபாட்டில்களை சேகரிக்கும் நடைமுறையை எதிர்த்து டாஸ்மாக் தொழிற்சங்கங்களின் போராட்ட நடவடிக்கை குழுவினர் இன்று ஆர்ப்பாட்டத்தில் ஈடுபட்டனர்.
தனி முகமை கோரிக்கை
காலி மதுபாட்டில்களை சேகரிக்கும் பணிகளை டாஸ்மாக் பணியாளர்கள் மூலமாக செய்யாமல், இதற்கென தனியாக ஒரு முகமையை நியமித்து செயல்படுத்த வேண்டும் என்பதே இந்த போராட்டத்தின் முதன்மையான கோரிக்கையாகும். இது குறித்து டாஸ்மாக் மேலாண்மை இயக்குநருக்கு வழங்கப்பட்ட மனுவில் ஊழியர்களின் பல்வேறு அவதிப்புகள் பட்டியலிடப்பட்டுள்ளன.
நிதி இழப்பும் நிர்வாகச் சுமையும்
காலி பாட்டில்களை சேகரிக்கும் செயல்பாட்டில் தினசரி கமிஷன் தொகையாகக் குறைந்தபட்சம் 3,000 முதல் 8,000 ரூபாய் வரை செலவாகிறது. மேலும், சுகாதாரத்தைப் பாதுகாப்பதற்காக கையுறை மற்றும் கிருமிநாசினி வாங்க தனி செலவுகள் ஏற்படுகின்றன. பாட்டில்களில் ஸ்டிக்கர் ஒட்டுவதற்கும், அவற்றைச் சேகரிப்பதற்கும் நாள்தோறும் ஆயிரம் ரூபாய் வீதம் கூலி வழங்க வேண்டிய சூழல் உள்ளதாக ஊழியர்கள் குறிப்பிட்டுள்ளனர்.
வசதி குறைபாடும் ஆரோக்கிய பாதிப்பும்
பாட்டில்களைச் சேகரித்து வைப்பதற்கான இடவசதி போதிய அளவில் இல்லாததால், மாதந்தோறும் 10,000 முதல் 30,000 ரூபாய் வரை அறை வாடகையாகச் செலவிடப்படுகிறது. ஏற்கனவே விற்பனைப் பணிகளை மேற்கொள்ள போதிய இடவசதி இல்லாத நிலையில், காலி பாட்டில்களைக் கையாள்வது பெரும் சிரமமாக உள்ளது.
மேலும், இந்த பணியினால் பணியாளர்களுக்குப் பல்வேறு நோய் தொற்று பாதிப்புகள் ஏற்படுவதாகவும், கடும் மன உளைச்சலுக்கு ஆளாக நேரிடுவதாகவும் தொழிற்சங்க நிர்வாகிகள் தெரிவித்துள்ளனர். எனவே, பணியாளர்களின் நலன் கருதி இந்தப் பணியிலிருந்து அவர்களை விடுவித்து, உரிய தீர்வை விரைந்து வழங்க வேண்டும் என்று அவர்கள் வலியுறுத்தியுள்ளனர்.
