பெண்ணின் தனிப்பட்ட புகைப்படங்களைத் தவறாகப் பயன்படுத்தி, சமூக வலைதளங்களில் போலி கணக்குகளை உருவாக்கி அவதிப்படுத்திய இளைஞரை தாம்பரம் மாநகர காவல்துறை கைது செய்துள்ளது.
போலி கணக்குகள் மூலம் மன உளைச்சல்
மேற்கு தாம்பரம் பகுதியைச் சேர்ந்த பெண் ஒருவரிடம் இருந்து காவல்துறைக்கு புகார் கிடைத்தது. அந்தப் புகாரில், தனது அந்தரங்கப் புகைப்படங்கள் இன்ஸ்டாகிராம் மற்றும் டெலிகிராம் போன்ற சமூக வலைதளங்களில் பயன்படுத்தப்பட்டு, போலி கணக்குகள் தொடங்கப்பட்டுள்ளதாகக் குறிப்பிட்டிருந்தார். இதன் காரணமாக, அந்தப் பெண்ணிற்குத் தேவையற்ற தொலைபேசி அழைப்புகள் வந்ததோடு, மிகுந்த மன உளைச்சலும் ஏற்பட்டதாகத் தெரிவிக்கப்பட்டது.
காவல்துறையின் தீவிர விசாரணை
பெறப்பட்ட புகாரின் அடிப்படையில் வழக்குப் பதிவு செய்த தாம்பரம் மாநகர காவல் மத்திய குற்றப்பிரிவு இணையவழி குற்றப்பிரிவு போலீசார் தீவிர விசாரணையை மேற்கொண்டனர். தாம்பரம் மாநகர காவல் ஆணையர் சஞ்சாய் குமாரின் உத்தரவின்படி, மத்திய குற்றப்பிரிவு துணை ஆணையர் வேல்முருகனின் வழிகாட்டுதலில் உதவி ஆய்வாளர் ராமசந்திரன் தலைமையில் ஒரு தனிப்படை அமைக்கப்பட்டது.
சமூக வலைதளத் தரவுகளை ஆய்வு செய்த போலீசாருக்கு, அந்தப் பெண்ணின் நண்பரான கரூர் மாவட்டம் குளித்தலை வட்டம் தோகமலையைச் சேர்ந்த சிவபிரகாஷ் என்பவர் தான் இந்தச் செயலில் ஈடுபட்டது தெரியவந்தது. மேலும், அவர் தற்போது தெலுங்கானா மாநிலம் ஷம்ஷாபாத் பகுதியில் தங்கியிருப்பது கண்டறியப்பட்டது.
காதல் வலையில் வீழ்த்தத் திட்டமிட்ட மோசடி
உடனடியாகத் தெலுங்கானா விரைந்த தனிப்படை போலீசார் சிவபிரகாஷை கைது செய்து விசாரணை நடத்தினர். விசாரணையில், சிவபிரகாஷ் அந்தப் பெண்ணை ஒருதலைப்பட்சமாகக் காதலித்ததாகவும், அந்தப் பெண்ணின் நம்பிக்கையைப்பெற்றுத் தனது காதல் வலையில் வீழ்த்தத் திட்டமிட்டதாகவும்த் தெரியவந்தது. இதற்காகவே வேண்டுமென்றே இந்தப் பிரச்சினையை உருவாக்கி, பின்னர் அவருக்கு ஆறுதல் கூறி நெருக்கத்தை ஏற்படுத்த முயன்றதாகக் ஒப்புக்கொண்டுள்ளார்.
கைது நடவடிக்கையும் எச்சரிக்கையும்
கைது செய்யப்பட்ட இளைஞரைத் தொடர்ந்து நீதிமன்றத்தில் ஆஜர்ப்படுத்திய போலீசார், இச்செயலுக்குப் பயன்படுத்திய கைப்பேசியையும் பறிமுதல் செய்தனர். இந்த நடவடிக்கையில் ஈடுபட்ட போலீசாருக்கு காவல் ஆணையர் சஞ்சாய் குமார் பாராட்டுத் தெரிவித்துள்ளார். மேலும், பெண்கள் மற்றும் குழந்தைகளுக்கு எதிரான குற்றங்களில் ஈடுபடுபவர்கள் மீது கடுமையான சட்ட நடவடிக்கைகள் எடுக்கப்படும் என்று அவர் எச்சரிக்கை விடுத்துள்ளார்.