பாகிஸ்தான் மற்றும் வங்கதேசம் ஆகிய நாடுகளுடன் இந்தியா பகிர்ந்து கொண்டுள்ள சுமார் 6,000 கிலோமீட்டர் நீளமுள்ள எல்லைப் பகுதிகளில் ஊடுருவலை முழுமையாகத் தடுக்கவும், அந்நாடுகளின் திட்டமிட்ட செயல்பாடுகளை முறியடிக்கவும் அடுத்த ஆண்டு முதல் நவீன பாதுகாப்பு திட்டத்தைச் செயல்படுத்த மத்திய அரசு முடிவு செய்துள்ளது. இது குறித்து மத்திய உள்துறை அமைச்சர் அமித் ஷா அதிகாரப்பூர்வமாக அறிவித்துள்ளார்.
எல்லைப் பாதுகாப்புப் படை (BSF) சார்பில் ஆண்டுதோறும் நடத்தப்படும் ருஸ்தம்ஜி நினைவு சொற்பொழிவில் கலந்துகொண்ட அமைச்சர் அமித் ஷா, நாட்டின் பாதுகாப்பு குறித்த தனது கருத்துக்களைப் பகிர்ந்துகொண்டார். அப்போது பேசிய அவர், இந்திய எல்லைக்குள் சட்டவிரோதமாக ஊடுருவும் ஒவ்வொரு நபையும் அரசு துல்லியமாகக் கண்டறிந்து, அவர்களை வெளியேற்ற உரிய நடவடிக்கைகள் எடுக்கப்படும் என்று உறுதியளித்தார்.
மாநில முதலமைச்சர்களுடன் ஆலோசனைக் கூட்டம்
எல்லைப் பாதுகாப்பு என்பது மத்திய அரசின் பொறுப்பு மட்டுமல்லாது, அந்தப் பகுதிகளில் அமைந்துள்ள மாநிலங்களின் ஒத்துழைப்பும் அவசியமானது என்று குறிப்பிட்ட அமைச்சர், இது தொடர்பாக திரிபுரா, மேற்கு வங்கம் மற்றும் அசாம் ஆகிய மாநிலங்களின் முதலமைச்சர்களுடன் தனது அமைச்சகம் விரைவில் ஒரு உயர்மட்டக் கூட்டத்தை ஒருங்கிணைக்க உள்ளதாகத் தெரிவித்தார். மாநில அரசுகளின் பங்களிப்புடன் எல்லைப் பாதுகாப்பை மேலும் பலப்படுத்த இந்த ஆலோசனைக் கூட்டம் அமையும் என்று எதிர்பார்க்கப்படுகிறது.
தொழில்நுட்ப ரீதியான பாதுகாப்பு வலுப்படுத்துதல்
அடுத்த ஓராண்டிற்குள் பாகிஸ்தான் மற்றும் வங்கதேச எல்லைகளில் ஒரு வலுவான பாதுகாப்பு வலைப்பின்னலை உருவாக்க அரசு திட்டமிட்டுள்ளதாக ஷா விளக்கினார். இந்தத் திட்டத்தின் கீழ், எல்லையைத் தாண்டி வரும் ஊடுருவல்களைக் கண்காணிக்க அதிநவீன தொழில்நுட்பங்கள் பயன்படுத்தப்பட உள்ளன.
குறிப்பாக, மனிதக் கண்காணிப்பிற்கு மாற்றாகத் தானியங்கி ட்ரோன்கள், மேம்படுத்தப்பட்ட ரேடார்கள் மற்றும் அதிநவீன ஸ்மார்ட் கேமராக்கள் மூலம் எல்லைப் பகுதிகள் கண்காணிக்கப்படும். இந்தத் தொழில்நுட்ப ஒருங்கிணைப்பு, எல்லைப் பகுதிகளில் ஒரு ஊடுருவ முடியாத பாதுகாப்பு அரணை உருவாக்க உதவும் என்று அவர் குறிப்பிட்டார்.