நாட்டுக்கு வரும் பெரிய ஆபத்திலிருந்து காக்க போராடும் ஹீரோவின் கதையே ‘பேட்ரியட்’. டேனியல் ஜேம்ஸ் (மம்மூட்டி) அரசாங்க பாதுகாப்பு பிரிவில் பணியாற்றும் அதிகாரி மற்றும் அமைச்சர் நளினிக்கு (ரேவதி) தொழில்நுட்ப ஆலோசனைகளை வழங்கும் நபர். அமைச்சர் சுந்தரம் (ராஜீவ் மேனன்) மகன் சக்தி (ஃபஹத் பாசில்) உடன் ஏதோ சதித்திட்டம் தீட்டுகிறார் என்பதை தெரிந்து கொள்ளும் நளினி அதனை பற்றி தெரிந்து கொள்ளும் பொறுப்பை டேனியலிடம் கொடுக்கிறார். அதிகாரவர்க்கத்தின் நெருக்கடி தாங்காமல் இந்தியாவிலிருந்து லண்டனுக்கு தப்பி ஓடுகிறார். அங்கிருந்து தொடர்ச்சியாக யூட்யூபில் சக்தியின் சதி திட்டங்களை தொடர்ந்து வீடியோவாக வெளியிடுகிறார்.
கதை அமைப்பும் முதல் பாதியும்
பரபரப்பான ஸ்பை ஆக்ஷன் த்ரில்லர் படத்தை கொடுக்க முயன்றிருக்கிறார் மகேஷ் நாராயணன். தொழில்நுட்பத்தை சார்ந்த வளர்ச்சியோ, ஆபத்தோ அது மிக எளிமையாக பலி கோருவது சாமானியர்களை தான் என்ற வலை பின்னலை கச்சிதமாக படத்தில் கொண்டுவந்திருந்த விதம் சிறப்பு. படத்தின் முதல் பாதி முழுக்க விறுவிறுப்பாக சுவாரஸ்யமாக நகர்கிறது. கதை அமைப்பை விரித்துவிட்டு, இடைவேளை சமயத்தில் ஒரு மாஸ் கொடுத்து எதிர்பார்ப்பை அதிகப்படுத்துகிறார்கள்.
AI வளர்ச்சி, மனிதர்களை கண்காணிக்கும் உளவு மென் பொருள், நாட்டையே கட்டுப்படுத்த நினைக்கும் முதலாளிகளின் சுயநலம் எனப் பல அபாயங்களை திரைக்கதையில் கச்சிதமாக சேர்த்திருக்கிறார்கள்.
நடிப்பும் தொழில்நுட்பமும்
மலையாள திரையுலகில் பல முன்னணி நட்சத்திரங்கள் இணைந்து நடித்திருப்பது படத்தின் மிகப்பெரிய ப்ளஸ். முதன்மை பாத்திரமான டேனியலாக மம்மூட்டி, எப்போதும் போல மிக இயல்பாக வந்து நல்ல நடிப்பை கொடுக்கிறார். தன்னை சுற்றி நடக்கும் ஆபத்துகளை உணர்வது, நண்பனுக்காக கலங்குவது, ஆக்ஷனில் கலக்குவது என எல்லா காட்சிகளிலும் அசத்துகிறார். எலைட்டான வில்லன்களாக ராஜீவ் மேனன், ஃபஹத் பாசில். ஃபஹத் நடிப்பு கொஞ்சம் பார்த்து பழகியது, ஆனால் ராஜீவ் மேனன் நடிப்பு அழுத்தமானதாக கவர்கிறது. க்ரே ஷேட் உள்ள பாத்திரத்தில் குஞ்சாக்கோ போபன் நல்ல நடிப்பை கொடுத்திருக்கிறார்.
மனுஷ் நந்தனின் ஒளிப்பதிவு சர்வதேச தரத்தில் படத்தை பதிவு செய்திருக்கிறார். சண்டைகள், சேசிங் என பல இடங்களில் தனித்து தெரிகிறது. சுஷின் ஷ்யாம் பின்னணி இசை பரபரப்பை சேர்க்க உதவுகிறது. மகேஷ் நாராயணன் – ராகுல் ராதாகிருஷ்ணன் படத்தொகுப்பு கச்சிதம்.
இரண்டாம் பாதி பலவீனம்
இப்படத்தின் குறை என்றால் அது படத்தின் இரண்டாம் பாதி தான். பரபரப்பாக இடைவேளை வரை செல்லும் படம், அதன் பின்னர் தடுமாறுகிறது. அதிலும் குறிப்பாக கடைசி 40 நிமிடங்கள் அலுப்பை ஏற்படுத்துகிறது. ஸ்பை த்ரில்லரை ஸ்லோபர்ன் படமாக கொடுக்க நினைத்தது சரி, ஆனால் அதனை எந்த சுவாரஸ்யமோ திருப்பமோ இல்லாமல் கொடுத்தது தான் பிரச்னை. சுந்தரம் பாத்திரத்துக்கு மகன் மேல் அக்கறை இல்லை என்றால், அவரை ஏன் பாதுகாக்க நினைக்கிறது? டேனியல் மனைவியை பிரிந்துவிட்டார் என்பது எளிமையாக புரிவது போல், டேனியல் – ஆயிஷா இடையிலான உறவு என்ன என்பது புரியவில்லை. தேவையே இல்லாமல் ஒரு முக்கிய பாத்திரத்திற்கு அப்படியான அதிர்ச்சி முடிவு ஏன்? இப்படி பல கேள்விகள் எழுகின்றன.
முடிவுரை
மொத்தத்தில், முதல் பாதியில் இருந்த சுவாரஸ்யமும், விறுவிறுப்பும் இரண்டாம் பாதியிலும் இருந்திருந்தால் அட்டகாசமான அனுபவமாக இருந்திருக்கும் இந்த ‘பேட்ரியட்’. மம்மூட்டி – மோகன்லால் ரசிகர்களுக்கு இது ஒரு பொழுதுபோக்கு படமாக இருக்கும், ஆனால் திடமான திரைக்கதை எதிர்பார்ப்பவர்களுக்கு சற்று ஏமாற்றம் தரலாம். முதல் பாதியின் சிறப்பும், நடிப்பு தரமும் படத்தை காப்பாற்றுகிறது.
