திருக்கணிதப் படி, வரும் 2026-ஆம் ஆண்டு ஜூன் மாதம் 2-ஆம் தேதி (வாக்கியப்படி மே மாதம் 26-ஆம் தேதி), குரு பகவான் கடக ராசிக்கு இடப்பெயர்ச்சி செய்கிறார். குரு பகவான் கடக ராசியில் அமரும்போது ‘உச்ச’ நிலையை அடைவதால், இந்த பெயர்ச்சி பல நட்சத்திரக்காரர்களுக்கு மிகுந்த முன்னேற்றத்தையும் பொருளாதார வளர்ச்சியையும் தரக்கூடியதாக இருக்கும்.
குறிப்பாக மிருகசீரிடம், திருவாதிரை, புனர்பூசம் மற்றும் பூசம் ஆகிய நட்சத்திரங்களின் வாழ்வில் இந்த பெயர்ச்சி ஏற்படுத்தப்போகும் தாக்கங்களை விரிவாகக் காண்போம்.
மிருகசீரிடம் நட்சத்திரம்: தெளிவான இலக்கு மற்றும் பொருளாதார வளர்ச்சி
செவ்வாயின் ஆதிக்கம் கொண்ட மிருகசீரிடம் நட்சத்திரக்காரர்கள் இயற்கையாகவே துணிச்சலும், அசாத்திய நம்பிக்கையும் கொண்டவர்களாக இருப்பார்கள். இந்த நட்சத்திரத்தின் முதல் இரண்டு பாதங்கள் ரிஷபத்திலும், அடுத்த இரண்டு பாதங்கள் மிதுனத்திலும் அமைந்துள்ளன.
குரு பகவான் கடக ராசியில் உச்சம் பெறுவதால், மிருகசீரிடம் நட்சத்திர அன்பர்களுக்கு வாழ்க்கையில் ஒட்டுமொத்த முன்னேற்றமும் செல்வ வரவும் ஏற்படும். குறிப்பாக, மனநிலையில் இருந்த அலைபாயும் தன்மை நீங்கி, எதிர்காலத்தைப் பற்றிய தெளிவான இலக்கு கிடைக்கும்.
ரிஷப ராசியைச் சேர்ந்தவர்களுக்குப் புதிய தொடர்புகள் மற்றும் தொழிலில் விரிவு ஏற்படும். நீண்டகாலத் திட்டங்களைச் செயல்படுத்தும் வாய்ப்பு கிடைக்கும். மிதுன ராசியைச் சேர்ந்தவர்களுக்குப் பேச்சுத்திறன் மேம்படும்; ஆசிரியர், ஆலோசகர் மற்றும் ஊடகத் துறையில் இருப்பவர்களுக்கு நல்ல அங்கீகாரம் கிடைக்கும். இருப்பினும், கோபத்தைக் கட்டுப்படுத்துவது அவசியமாகும்.
வழிபாட்டு முறை
செவ்வாய்க்கிழமைகளில் முருகப்பெருமானை வழிபடுவதும், திருப்புகழ் படிப்பதுமான சிறப்பு பலன்களைத் தரும். இயலாதபட்சத்தில் சிவன் கோயிலில் விளக்கு ஏற்றுவது மன அமைதியைத் தரும்.
திருவாதிரை நட்சத்திரம்: பொருளாதார மந்தநிலை நீங்கும்
முழுமையாக மிதுன ராசியில் அமைந்துள்ள திருவாதிரை நட்சத்திரத்தின் அதிபதி ராகு ஆவார். சிறந்த அறிவாற்றலும், எதிரிகளை வெல்லும் ஆற்றலும் இவர்களிடம் இயல்பாகவே இருக்கும்.
குரு பகவான் கடக ராசிக்கு நகர்வது, மிதுன ராசி அன்புகளுக்கு ‘தன ஸ்தானமாக’ அமைகிறது. இதனால் கடந்த சில ஆண்டுகளாக நிலவி வந்த பொருளாதார மந்தநிலை மெதுவாகச் சீராகும். வருமானம் அதிகரிக்கும் வாய்ப்புடன், சேமிப்பு குறித்த ஆர்வம் ஏற்படும்.
மன அழுத்தமும் குழப்பங்களும் நீங்கி, குடும்பத்தில் ஒற்றுமை அதிகரிக்கும். வாழ்க்கையில் ஒருவித நிலைத்தன்மை ஏற்படும் காலம் இது.
வழிபாட்டு முறை
காலபைரவர் மற்றும் தட்சிணாமூர்த்தி வழிபாடுகள் மிகுந்த பலனைத் தரும். ராகுவின் தாக்கத்தைச் சமநிலைப்படுத்த நாகபூஜை அல்லது துர்கை அம்மன் வழிபாட்டை மேற்கொள்ளலாம்.
புனர்பூசம் நட்சத்திரம்: தடைகள் நீங்கி யோகக் காலம்
குருவின் சாரத்தைப் பெற்ற புனர்பூசம் நட்சத்திரக்காரர்கள் தர்ம சிந்தனையாளர்களாகவும், இரக்க குணமுடையவர்களாகவும் இருப்பார்கள். இந்த நட்சத்திரத்தின் முதல் மூன்று பாதங்கள் மிதுனத்திலும், நான்காம் பாதம் கடகத்திலும் உள்ளன.
தன்னுடைய அதிபதியான குரு பகவான் உச்ச நிலையில் அமர்வதால், புனர்பூசம் நட்சத்திர அன்பர்களுக்குத் தடைகளும் தாமதங்களும் விலகும். குறிப்பாக மிதுன ராசி அன்பர்களுக்குக் குடும்பத்தில் சுப நிகழ்ச்சிகள் நடைபெற வாய்ப்புள்ளது. திருமண முயற்சிகள் கைகூடும்.
ஆசிரியர், எழுத்தாளர் மற்றும் ஆன்மிகப் பேச்சாளர்களாக இருப்பவர்களுக்குச் சமூகத்தில் மதிப்பும் மரியாதையும் உயரும்.
வழிபாட்டு முறை
ஹயக்ரீவரை வழிபடுவதும், வியாழக்கிழமைகளில் தட்சிணாமூர்த்திக்கு நெய்தீபம் ஏற்றி வணங்குவதும் வாழ்க்கையில் மேன்மையை உண்டாக்கும்.
பூசம் நட்சத்திரம்: நிலையான வெற்றியும் நிம்மதியும்
முழுமையாகக் கடக ராசியில் அமைந்துள்ள பூசம் நட்சத்திரத்தின் அதிபதி சனி பகவான். இவர்கள் பொறுமை மற்றும் விருந்தோம்பலில் சிறந்தவர்கள். கடின உழைப்பிற்குப் பிறகு நிலையான வெற்றியைப் பெறுபவர்கள்.
தற்போது குரு பகவான் ஜன்ம ராசியான கடகத்திலேயே உச்ச நிலையை அடைவதால், பூசம் நட்சத்திரக்காரர்களுக்கு இது மிக முக்கியமான காலமாகும். சனியின் கடினமான அனுபவங்கள் குறைந்து, மன நிம்மதியும் பாதுகாப்பும் கிடைக்கும்.
கடந்த கால மனச்சுமைகள் நீங்கி, தன்னம்பிக்கை அதிகரிக்கும். வீடு, வாகனம் மற்றும் சொத்துக்கள் வாங்கும் யோகங்கள் உருவாகும் வாய்ப்பு உள்ளது.
#astrology #jupiterTransit2026 #tamilHoroscope #spiritual #mirugasiridamNatchathiram #thiruvathiraiNakshatra #punarpoosamNakshatra #gurupeyarchi #2026Gurupeyarchi #2026GuruPeyarchiNatchathiraPalangal
