இந்தியாவின் பிரதமராகத் தொடர்ந்து 4,399 நாட்களை நிறைவு செய்துள்ள நரேந்திர மோடி, மக்களால் தேர்ந்தெடுக்கப்பட்ட பிரதமர்களில் மிக நீண்ட காலம் பதவி வகித்தவர் என்ற வரலாற்றுச் சாதனையை எட்டியுள்ளார். இந்தச் சிறப்பம்சத்தை முன்னிட்டு மத்திய தகவல் மற்றும் ஒலிபரப்புத்துறை இணை அமைச்சர் எல்.முருகன் தனது மனமார்ந்த வாழ்த்துகளைத் தெரிவித்துள்ளார்.
தேச வளர்ச்சியின் மைல்கல்
இது குறித்து எல்.முருகன் வெளியிட்டுள்ள வாழ்த்துச் செய்தியில், பாரத தேசத்தின் சாதனை சரித்திரத்தில் இந்த நிகழ்வு ஒரு மாபெரும் மைல்கல் என்று குறிப்பிட்டுள்ளார். “வளர்ச்சியடைந்த பாரதம்” என்ற இலக்கை நோக்கிய பயணத்தில் இந்த சாதனை ஒரு முக்கிய அடையாளமாகும் என்றும், மக்கள் பணியையே முதன்மையான நோக்கமாகக் கொண்டு செயல்படும் தலைவருக்கு நாட்டு மக்கள் அளித்துள்ள அங்கீகாரம் இது என்றும் அவர் தெரிவித்துள்ளார்.
மாற்றங்களின் மையப்புள்ளி
கடந்த 12 ஆண்டுகளில் இந்திய நாடு பல்வேறு முன்னேற்றங்களையும் மாற்றங்களையும் கண்டுள்ளது. இந்த மாற்றங்களின் மையப்புள்ளியாகப் பிரதமர் நரேந்திர மோடி திகழ்கிறார் என்று எல்.முருகன் புகழாரம் சூட்டியுள்ளார். குறிப்பாக, ஏழைகள் மற்றும் ஒடுக்கப்பட்ட மக்களின் நலன்களை மேம்படுத்த மத்திய அரசு தொடர்ந்து எடுத்து வரும் முயற்சிகள் குறிப்பிடத்தக்கவை என்று அவர் குறிப்பிட்டுள்ளார்.
விளிம்பு நிலை மக்களின் முன்னேற்றம்
பல ஆண்டுகளாக அரசின் திட்டங்கள் மற்றும் வளர்ச்சியின் பலன்களைப் பெற முடியாமல் விளிம்பு நிலையில் இருந்த மக்களுக்கு, இன்று அனைத்து உதவிகளும் நேரடியாகக் கிடைப்பதை உறுதி செய்ததில் பிரதமரின் தலைமைக்கு முக்கியப் பங்கு உண்டு என்று அவர் தெரிவித்துள்ளார். பாரத நாடு இன்னும் பல ஆண்டுகள் வெற்றிகரமாக இயங்கவும், உலக நாடுகளுக்கு வழிகாட்டும் “உலகின் குருவாக” உருவெடுக்கவும் இது வழிவகுக்கும் என்று அவர் தனது செய்தியில் நம்பிக்கை தெரிவித்துள்ளார்.