ஆக்கிரமிப்பு காஷ்மீர் பகுதியில் பாகிஸ்தான் அரசின் அடக்குமுறைகளுக்கு எதிராகவும், அடிப்படை உரிமைகளை மீட்டெடுக்கக் கோரியும் போராட்டக்குழுவினர் தீவிரமாகப் போராடி வருகின்றனர். இந்த இக்கட்டான சூழலில், தங்களுக்கு ஆதரவு வழங்க வேண்டும் என்று ஜம்மு காஷ்மீர் பகுதியில் உள்ள மக்களை அவர்கள் கேட்டுக்கொண்டுள்ளனர்.
பொருளாதார வீழ்ச்சியும் ராணுவ அடக்குமுறையும்
பாகிஸ்தானில் நிலவி வரும் கடுமையான பொருளாதார வீழ்ச்சி, ஆக்கிரமிப்பு காஷ்மீர் மக்களின் வாழ்க்கையைத் தலைகீழாக மாற்றியுள்ளது. அரசியல் ரீதியாகத் தாங்கள் புறக்கணிக்கப்படுவதாகக் கூறி, ராவல்கோட் பகுதியில் மக்கள் அமைதியான முறையில் போராட்டத்தில் ஈடுபட்டனர். ஆனால், இந்தப் போராட்டக்காரர்கள் மீது பாகிஸ்தான் ராணுவம் நடத்திய துப்பாக்கிச்சூட்டில் 60-க்கும் மேற்பட்டவர்கள் உயிரிழந்தனர்.
இந்தக் கொடூரமான தாக்குதலுக்குப் பிறகு, ஆக்கிரமிப்பு காஷ்மீரில் மனித உரிமைகளை மீட்டெடுக்கக் கோரி ‘அவாமி அதிரடி குழு’ பல்வேறு போராட்டங்களை முன்னெடுத்து வருகிறது. மக்கள் போராட்டங்களை ஒடுக்குவதற்காக, பாகிஸ்தான் அரசு அந்தப் பகுதிக்கு வரும் உணவு விநியோகத்தைத் தடுத்ததுடன், போக்குவரத்துத் தடைகளையும் ஏற்படுத்தியுள்ளது என்று குற்றம் சாட்டப்படுகிறது.
சர்வதேச அமைப்புகளின் கண்டனம்
பாகிஸ்தானின் இந்த அத்துமீறல்கள் குறித்து சர்வதேச அளவில் கவனத்தை ஈர்க்கும் நோக்கில், கடந்த சில நாட்களுக்கு முன்னதாக ஐக்கிய நாடுகள் சபையின் அலுவலகத்திற்கு முன்பாகப் போராட்டக்குழுவினர் கவன ஈர்ப்புப் போராட்டம் நடத்தினர். இதற்கிடையில், சர்வதேச மனித உரிமைக் கண்காணிப்பு அமைப்பான ஆம்னெஸ்டி, ஆக்கிரமிப்பு காஷ்மீரில் பாகிஸ்தான் ராணுவம் மேற்கொண்டு வரும் மனித உரிமை மீறல்களைக் கடுமையாகக் கண்டித்துள்ளது.
ஜம்மு காஷ்மீர் மக்களுக்கு அழைப்பு
தொடர்ந்து நடைபெற்று வரும் போராட்டங்களுக்கு வலுசேர்க்கும் வகையில், பூஞ்ச், ரஜோரி, காஷ்மீர் மற்றும் லடாக் பகுதிகளில் உள்ள மக்கள் ஆதரவு அளிக்க வேண்டும் என்று போராட்டக்குழுவினர் கோரிக்கை விடுத்துள்ளனர். இது தொடர்பாக போராட்டக்குழுவைச் சேர்ந்த சர்தார் அமன் கான் வெளியிட்டுள்ள வீடியோ பதிவில், ஆக்கிரமிப்பு காஷ்மீர் மக்கள் சந்திக்கும் துயரங்களை விவரித்துள்ளார்.
அந்த வீடியோவில் அவர் கூறுகையில், “கடந்த ஒரு மாதமாக ஆக்கிரமிப்பு காஷ்மீரில் மக்கள் கடும் அடக்குமுறையைச் சந்தித்து வருகின்றனர். அடிப்படை உரிமைகளைக் கேட்டதற்காகக் கொடூரமான இனப்படுகொலை மற்றும் ராணுவ அத்துமீறல்கள் தொடர்ந்து நீடிக்கின்றன. உணவு மற்றும் மருந்துப் பொருட்கள் விநியோகிக்கப்படும் வழிகளும் முழுமையாக அடைக்கப்பட்டு, மக்கள் மூச்சுவிட முடியாத சூழலில் உள்ளனர்” என்று உருக்கமாகத் தெரிவித்துள்ளார்.
மேலும், எல்லை தாண்டித் தொடர்பில் இருக்கும் பூஞ்ச், மெந்தார், ரஜோரி, ஜம்மு பள்ளத்தாக்கு, லடாக் மற்றும் கார்கிலில் வாழும் மக்கள், நாளை நடைபெறவுள்ள போராட்டத்திற்கு ஆதரவு அளிக்க வேண்டும் என்றும், சக மனிதர்களுக்கு இழைக்கப்படும் அநீதிக்கு எதிராகக் குரல் கொடுக்க வேண்டும் என்றும் அவர் அழைப்பு விடுத்துள்ளார்.