இந்தியா மற்றும் பாகிஸ்தான் நாடுகளுக்கு இடையிலான சிந்து நதிநீர் பகிர்வு ஒப்பந்தம் தொடர்பான பதற்றம் மீண்டும் அதிகரித்துள்ளது. ஜம்மு காஷ்மீரின் பஹல்காமில் கடந்த 2025 ஆம் ஆண்டு நிகழ்ந்த பயங்கரவாதத் தாக்குதலில் 26 பேர் உயிரிழந்ததைத் தொடர்ந்து, நதிநீர் பகிர்வு ஒப்பந்தத்தை இந்தியா நிறுத்தி வைத்தது. இந்த நடவடிக்கையும், செனாப் நதியின் குறுக்கே அணை கட்ட இந்தியா காட்டி வரும் தீவிரமுமே தற்போதைய விவாதங்களுக்கு அடிப்படையாக உள்ளது.
பாகிஸ்தானின் விவசாயத் தேவைகள் மற்றும் பொருளாதார மேம்பாடுகள் பெரும் அளவில் சிந்து நதி மற்றும் அதன் கிளை நதிகளைச் சார்ந்தே உள்ளன. இந்தச் சூழலில், நீர் விநியோகத்தில் ஏற்படும் எந்தவொரு மாற்றமும் அந்நாட்டின் பொருளாதாரத்தில் பெரும் தாக்கத்தை ஏற்படுத்தும் என்பதால், பாகிஸ்தான் அரசு கடும் கவலையை வெளிப்படுத்தி வருகிறது.
இஸ்லாமாபாத்தில் அமைச்சர்கள் அறிக்கை
இந்நிலையில், பாகிஸ்தானின் தகவல் தொடர்புத்துறை அமைச்சர் அத்தாவுல்லா தரார் மற்றும் காலநிலை மாற்றத்துறை அமைச்சர் முசாதிக் மாலிக் ஆகியோர் நேற்று இஸ்லாமாபாத்தில் செய்தியாளர்களைச் சந்தித்து உரையாற்றினர். அப்போது அவர்கள் இந்திய அரசின் முடிவுகளைக் கடுமையாக விமர்சித்தனர்.
அமைச்சர் முசாதிக் மாலிக் பேசுகையில், “எங்கள் நாட்டுக்கான நதிநீர் விநியோகத்தை அண்டை நாட்டின் பிரதமர் தனது கட்டுப்பாட்டில் வைத்துள்ளார். பாகிஸ்தானுக்கு ஒரு சொட்டுத் தண்ணீரைக் கூட விடமாட்டேன் என்று அவர் கூறுகிறார். எங்களது நதிநீர் உரிமைகளுக்கு ஆபத்து விளைவிக்க முயற்சித்து, எங்கள் பங்கையும் எடுத்துக்கொள்பவர்களின் கைகளை நாங்கள் வெட்டுவோம்” என்று மிகக் கடுமையான வார்த்தைகளைப் பயன்படுத்தி எச்சரித்தார்.
சர்வதேச சட்டங்களின் மீறல் என குற்றச்சாட்டு
தகவல் தொடர்புத்துறை அமைச்சர் அத்தாவுல்லா தரார் பேசும் போது, 1960 ஆம் ஆண்டு உலக வங்கியின் மத்தியஸ்தத்துடன் கையெழுத்தான இந்த ஒப்பந்தம், சர்வதேச சட்டங்களின்படி இன்றும் செல்லுபடியாகும் நிலையில் இருப்பதை வலியுறுத்தினார். “சிந்து நதிநீர் ஒப்பந்தத்தை நிறுத்தவோ அல்லது மாற்றியமைக்கவோ இந்தியா எடுத்த தன்னிச்சையான முடிவிற்கு சர்வதேச அரங்கில் எந்தவொரு ஆதரவும் கிடைக்கவில்லை” என்று அவர் குறிப்பிட்டார்.
முன்னதாக, பாகிஸ்தான் பாதுகாப்பு அமைச்சர் கவாஜா ஆசிப், நதிநீர் விநியோகம் முழுமையாக நிறுத்தப்பட்டதாகத் தெரியவந்தால், இந்தியா மீது போர் தொடுக்க நேரிடும் என்று எச்சரித்திருந்தார். தொடர்ச்சியான இந்த மிரட்டல்கள் இரு நாடுகளுக்கு இடையிலான உறவில் மேலும் விரிசலை ஏற்படுத்தியுள்ளன.
இந்த விவகாரத்தில் பாகிஸ்தானின் சட்டப்பூர்வ உரிமைகளை உலக நாடுகளின் கவனத்திற்கு கொண்டு செல்ல, சர்வதேச நதிநீர் நிபுணர்கள் மற்றும் வெளிநாட்டுப் பிரதிநிதிகள் பங்கேற்கும் ஒரு முக்கிய மாநாட்டை இஸ்லாமாபாத்தில் நடத்த பாகிஸ்தான் அரசு திட்டமிட்டுள்ளது.