கேரள மாநில சட்டமன்றத்தில் ஆளுநரின் கொள்கை உரை நிகழ்வின் போது, தேசியப் பாடலான வந்தே மாதரம் முழுமையாக இசைக்கப்படாதது குறித்து ஆளுநர் ராஜேந்திர விஸ்வநாத் அர்லேகர் தனது அதிருப்தியைத் தெரிவித்துள்ளார்.
கேரளாவில் சமீபத்தில் நடைபெற்ற சட்டமன்றத் தேர்தல்களில், காங்கிரஸ் தலைமையிலான ஐக்கிய ஜனநாயக முன்னணி 102 இடங்களை வென்று பெரும்பான்மை பெற்றது. இடது முன்னணி 35 இடங்களுடன் சரிந்தது. இதனைத் தொடர்ந்து, பினராயி விஜயன் தனது முதலமைச்சர் பதவியிலிருந்து விலகினார். ஐக்கிய ஜனநாயக முன்னணி சார்பில் வி.டி. சதீஷன் புதிய முதலமைச்சராகப் பொறுப்பேற்றார்.
சட்டமன்ற நிகழ்வில் எழுந்த சர்ச்சை
புதிய அரசு பொறுப்பேற்ற பிறகு, இன்று மாநில சட்டமன்றக் கூட்டத்தொடர் தொடங்கியது. இதில் ஆளுநர் ராஜேந்திர விஸ்வநாத் அர்லேகர் பங்கேற்று அரசின் கொள்கை உரையை வாசித்தார். இந்த நிகழ்வின் தொடக்கத்திலும் முடிவிலும் வந்தே மாதரம் பாடல் இசைக்கப்பட்டது. இருப்பினும், இந்தப் பாடல் முழுமையாகப் பாடப்படாமல், அதன் முதல் பத்தி மட்டுமே இசைக்கப்பட்டிருந்தது.
முன்னதாக, புதிய அரசு பதவி ஏற்பு நிகழ்ச்சியின் போது வந்தே மாதரம் பாடல் முழுமையாகப் பாடப்பட்டிருந்தது. ஆனால், இன்றைய கூட்டத்தொடரில் பாடல் முழுமையாக இசைக்கப்படாதது அரசியல் வட்டாரத்தில் விவாதத்தை ஏற்படுத்தியுள்ளது.
ஆளுநரின் விளக்கம்
சட்டமன்றத்தில் தனது உரையினை நிறைவு செய்துவிட்டு ஆளுநர் மாளிகைக்குத் திரும்பிய அர்லேகர், அங்கு செய்தியாளர்களைச் சந்தித்துப் பேசினார். அப்போது அவர், “சட்டமன்ற அவைக்கு ஆளுநர் வருகை தரும்போது, வந்தே மாதரம் பாடல் முழுமையாகப் பாடப்பட வேண்டும். ஆனால் இன்று, அந்தப் பாடல் முழுமையாகப் பாடப்படாமல் வெறும் இசை வடிவத்தில் மட்டுமே ஒலிபரப்பப்பட்டது” என்று தனது கருத்தைத் தெரிவித்தார்.
முன்னதாக, தமிழ்நாட்டிலும் ஆளுநர் அர்லேகர் பங்கேற்ற முதலமைச்சர் பதவி ஏற்பு மற்றும் அமைச்சரவை விரிவாக்க நிகழ்வுகளின் போது வந்தே மாதரம் பாடல் பாடப்பட்டிருந்தது. அப்போது பல்வேறு அரசியல் கட்சிகள் இதற்கு எதிர்ப்புத் தெரிவித்திருந்தன என்பது குறிப்பிடத்தக்கது.
