நீலகிரி மாவட்டம் கூடலூர் தாலுகா நாடுகாணி பகுதியில் உள்ள தனியார் தோட்டத்திற்குள் புகுந்த காட்டு யானை தாக்கியதில், 50 வயது மதிக்கத்தக்க பெண் ஒருவர் பரிதாபமாக உயிரிழந்தார்.
பாண்டியாறு மற்றும் புன்னம்புழா ஆறுகள் கேரள மாநிலத்தை நோக்கி பாயும் இப்பகுதி, அடர்ந்த வனப்பகுதியாக இருப்பதால் காட்டு யானைகள் உள்ளிட்ட வனவிலங்குகளின் முக்கிய புகலிடமாகத் திகழ்கிறது. இதனால் பொது மக்கள் இந்தப் பகுதிக்குள் நுழைய வனத்துறையினர் முன்னதாகவே தடை விதித்திருந்தனர். இருப்பினும், தமிழக மற்றும் கேரள மாநிலத்தைச் சேர்ந்த பலர் இந்தத் தடையை மீறி ஆற்றில் மீன் பிடித்தல் மற்றும் குளித்தல் போன்ற செயல்களில் தொடர்ந்து ஈடுபட்டு வருகின்றனர்.
நடந்த விபரம்
கீழ்நாடுகாணி புன்னம்புழா ஆற்றின் கரையோரம் அமைந்துள்ள தனியார் தோட்டப்பகுதியில் காட்டு யானை ஒன்று தாக்கி பெண் ஒருவர் உயிரிழந்ததாக பந்தலூர் வனத்துறைக்குத் தகவல் கிடைத்தது. இதனைத் தொடர்ந்து, வனச்சரகர் சஞ்சீவி தலைமையிலான வனத்துறையினர் இரவு நேரத்திலேயே புன்னம்புழா ஆற்றங்கரையில் தீவிர தேடுதல் பணியில் ஈடுபட்டனர்.
தோட்டப்பகுதியில் விசாரணை நடத்தியபோது, தேவாலா அட்டி தேக்கம்பாடியைச் சேர்ந்த கும்பிளி, அவரது மனைவி மீனாட்சி (50) மற்றும் உறவினர் மணி ஆகிய மூவரும் ஆற்றில் மீன் பிடிக்கச் சென்றது தெரியவந்தது. மீன் பிடித்த பிறகு, அவர்கள் தங்கியிருந்த தோட்டத்து கொட்டகையை நோக்கி அடர்ந்த வனப்பகுதி வழியாக இருட்டில் நடந்து வந்துள்ளனர்.
உயிரிழப்பு மற்றும் மீட்பு
அவர்கள் நடந்து வந்தபோது, அங்கு மறைந்திருந்த காட்டு யானை ஒன்று திடீரெனத் தாக்கி அவர்களைத் துரத்தியுள்ளது. இதில் கும்பிளி மற்றும் மணி இருவரும் அதிர்ஷ்டவசமாகத் தப்பித்துவிட்டனர். ஆனால், மீனாட்சி மட்டும் யானையின் தாக்குதலுக்கு உள்ளாகி, சம்பவ இடத்திலேயே பரிதாபமாக உயிரிழந்தார்.
மீட்புப் பணியில் ஈடுபட்ட வனத்துறையினர், உயிரிழந்த பெண்ணின் உடலை மீட்டனர். வனப்பகுதிக்குள் நுழையும் போது மிகுந்த எச்சரிக்கையுடன் இருக்குமாறு அப்பகுதி மக்களுக்கு வனத்துறையினர் மீண்டும் அறிவுறுத்தியுள்ளனர்.
