தெலுங்கு திரையுலகின் முன்னணி இயக்குநர்களில் ஒருவரான பூரி ஜெகன்நாத், தற்போது நடிகர் விஜய் சேதுபதியை நாயகனாகக் கொண்டு ‘ஸ்லம் டாக்: 33 டெம்பிள் ரோடு’ என்ற திரைப்படத்தை இயக்கியுள்ளார். இப்படத்தின் டீசர் வெளியீட்டு விழா நேற்று மாலை சென்னையில் வெகு விமரிசையாக நடைபெற்றது.
தயாரிப்பாளர் சார்மி கௌரின் நினைவலைகள்
இந்நிகழ்வில் கலந்துகொண்டு பேசிய தயாரிப்பாளர் சார்மி கௌர், தனது திரைப்பயணத்தின் தொடக்க கால நினைவுகளைப் பகிர்ந்து கொண்டார். 2002-ஆம் ஆண்டு ‘காதல் அழிவதில்லை’ திரைப்படத்திற்காக முதன்முதலில் சென்னை வந்தபோது ஊடகவியலாளர்களைச் சந்தித்த நிகழ்வுகள் இன்றும் தனது நினைவில் பசுமையாக இருப்பதாகக் குறிப்பிட்டார். அதன் பிறகு பல படங்களில் நடித்ததன் மூலம் தமிழக ரசிகர்களிடமிருந்தும், ஊடக நண்பர்களிடமிருந்தும் மிகுந்த அன்பைப் பெற்றதாக அவர் தெரிவித்தார்.
தொடர்ந்து பேசிய அவர், “முன்னதாக நடிகையாக சென்னை வந்திருந்த நான், தற்போது தயாரிப்பாளராக மீண்டும் வந்திருப்பது எனக்கு மிகுந்த மகிழ்ச்சியை அளிக்கிறது. எங்களது ‘பூரி கனெக்ட்ஸ்’ நிறுவனம் சார்பில் பல வெற்றிப் படங்களைத் தயாரித்துள்ளோம். இருப்பினும், நேரடியாகத் தமிழ் மொழியில் திரைப்படத்தைத் தயாரிக்கும் எங்களது முதல் முயற்சி இது என்பதால், இந்தப் படம் எனக்கு மிகவும் தனிச்சிறப்பு வாய்ந்தது” என்று கூறினார்.
விஜய் சேதுபதியின் தனித்துவம்
நடிகர் விஜய் சேதுபதி குறித்துப் பேசிய சார்மி கௌர், அவர் ஒரு சிறந்த நடிகராக மட்டுமன்றி, மிகப்பெரிய நட்சத்திரமாகவும் திகழ்வதாகப் பாராட்டினார். ஒரு திரைப்படத்திற்குத் தேவையான நடிப்புத் திறமையும், வணிக ரீதியான ஈர்ப்பும் ஆகிய இரண்டையும் சமமாகக் கொண்டுள்ள நடிகர் விஜய் சேதுபதி என அவர் புகழாரம் சூட்டினார். மேலும், இந்தப் படத்தில் இணைந்து பணியாற்றியதற்காக அவருக்குத் தனது மனமார்ந்த நன்றிகளைத் தெரிவித்துக் கொண்டார்.
படத்தின் சிறப்பம்சங்கள் மற்றும் வெளியீடு
தபு மேடத்தின் பங்களிப்பு குறித்துக் கேட்டபோது, இந்தக் கதாபாத்திரத்திற்கு ஆரம்பத்திலிருந்தே அவரைத்தான் தேர்வு செய்ய வேண்டும் என்று நினைத்ததாகக் கூறினார். கதையைக் கேட்டவுடனேயே அவர் சம்மதித்ததோடு, திரைக்கதையைப் பாராட்டி நம்பிக்கையளித்ததாகவும் தெரிவித்தார்.
இப்படம் தமிழ், தெலுங்கு, இந்தி, மலையாளம் மற்றும் கன்னடம் ஆகிய மொழிகளில் உலகளவில் சிறந்த முறையில் வெளியிடப்படும் என்று உறுதியளித்த தயாரிப்பாளர், ‘ஸ்லம் டாக்’ திரைப்படம் ஆக்ஷன் மற்றும் உணர்ச்சிகளின் கலவையாக உருவாக்கப்பட்டுள்ளதாக விளக்கினார். நிஜத்தன்மை கொண்ட சண்டைக் காட்சிகளும், மனித உணர்வுகளும் இந்தப் படத்தில் இடம்பெற்றுள்ளதாகக் குறிப்பிட்ட அவர், பூரி ஜெகன்நாத்தின் திரைக்கதையுடனும் விஜய் சேதுபதியின் நடிப்பும் இணைந்து இந்தப் படம் ரசிகர்களைக் கவரும் என்று நம்பிக்கையை வெளிப்படுத்தினார்.