மத்திய அரசு செயல்படுத்தி வரும் கிசான் சம்ரிதி திட்டம், இந்திய வேளாண் துறையில் ஒரு முழுமையான மாற்றத்தை ஏற்படுத்தியுள்ளதாக மத்திய இணை அமைச்சர் எல்.முருகன் தெரிவித்துள்ளார். இது குறித்து அவர் தனது எக்ஸ் சமூக வலைதளப் பக்கத்தில் பதிவிட்டுள்ளார்.
வேளாண் துறையில் நவீனமயமாக்கல்
பிரதமர் நரேந்திர மோடியின் தலைமையில் கிசான் சம்ரிதி திட்டம் தொடங்கி 12 ஆண்டுகள் நிறைவடைந்தது குறித்து பதிவிட்டுள்ள அமைச்சர் எல்.முருகன், ‘கிசான் கல்யாண்’ என்ற தொலைநோக்குப் பார்வையின் அடிப்படையில் இந்த முன்னெடுப்பு கொண்டு வரப்பட்டது என்பதைச் சுட்டிக்காட்டினார். இத்திட்டத்தின் மூலம் வேளாண் துறையில் அறிவியல் முன்னேற்றங்கள் மற்றும் நவீன தொழில்நுட்பங்கள் புகுத்தப்பட்டிருப்பதாக அவர் குறிப்பிட்டுள்ளார்.
விவசாயிகளின் திறன் மேம்பாடு
விவசாயிகளின் தன்னிறைவு மற்றும் திறன்மிக்க விவசாயிகளின் தலைமுறையை உருவாக்குவதே இந்த மாற்றத்தின் மையப்புள்ளி என்று அவர் விளக்கியுள்ளார். குறிப்பாக, முழுமையான வளர்ச்சி மற்றும் நவீனமயமாக்கல் ஆகியவற்றின் மூலம் விவசாயிகளின் வாழ்வாதாரம் மேம்படுத்தப்பட்டுள்ளதாகத் தெரிவித்துள்ளார்.
மேலும், பிரதமர் நரேந்திர மோடியின் வழிகாட்டுதலின் கீழ், நாட்டின் விவசாயிகளின் நலன்களை மேலும் வலுப்படுத்தும் பணிகளை அரசு தொடர்ந்து மேற்கொண்டு வருவதாக அமைச்சர் எல்.முருகன் தனது பதிவில் குறிப்பிட்டுள்ளார். இறுதியில் ‘ஜெய் கிசான், ஜெய் பாரத்’ என தனது பதிவை நிறைவு செய்துள்ளார்.