சென்னையிலிருந்து வேளாங்கண்ணி பேராலயத்திற்குச் சென்ற குடும்பத்தினர் வாகனம் விபத்துக்குள்ளானதில், மருத்துவ மாணவி ஒருவர் உயிரிழந்த சம்பவம் பெரும் சோகத்தை ஏற்படுத்தியுள்ளது.
சென்னை கேளம்பாக்கம் கிழக்கு கடற்கரை சாலை பகுதியைச் சேர்ந்தவர் அந்தோணிராஜ் (47). இவர் தனது குடும்பத்தினர் மற்றும் உறவினர்களுடன் இரண்டு கார்களில் சென்னையில் இருந்து வேளாங்கண்ணி பேராலயத்திற்குப் பயணம் செய்துள்ளார்.
கட்டுப்பாட்டை இழந்த கார்
இதில் அந்தோணிராஜ் உள்ளிட்ட ஆறு பேர் பயணித்த காரை, அவரது உறவினரான சத்தியராஜ் இயக்கி வந்தார். வாகனம் மயிலாடுதுறை அருகே பெரம்பூர் காவல் நிலைய எல்லைக்குட்பட்ட கடலி என்ற இடத்தைக் கடந்தபோது, திடீரென ஓட்டுநரின் கட்டுப்பாட்டை இழந்து சாலையோரத்திலிருந்த மரத்தில் பலமாக மோதியது.
இந்தக் கொடிய விபத்தில் காரில் இருந்த அந்தோணிராஜ், அவரது மனைவி சங்கீதா (42), மகள் ஹரிணி (20), மற்றும் உறவினர்களான லிபியா ஜாய்சி, சத்தியராஜ், பிரேமா ஆகியோர் பலத்த காயமடைந்தனர்.
மருத்துவமனையில் உயிரிழப்பு
விபத்தைக் கண்ட அப்பகுதி மக்கள் உடனடியாக மீட்புப் பணியில் ஈடுபட்டு, காயமடைந்தவர்களை மயிலாடுதுறை அரசு மருத்துவமனைக்கு அனுப்பி வைத்தனர். அங்கு சிகிச்சைக்காகக் கொண்டுவரப்பட்ட ஹரிணியை பரிசோதித்த மருத்துவர்கள், அவர் ஏற்கனவே உயிரிழந்துவிட்டதாகத் தெரிவித்தனர்.
உயிரிழந்த ஹரிணி சென்னை மருத்துவக் கல்லூரியில் இரண்டாம் ஆண்டு பயின்று வந்த மாணவி என்பது தெரிய வந்துள்ளது. விபத்தில் காயமடைந்த மற்ற ஐந்து நபர்களுக்கும் மருத்துவமனையில் தீவிர சிகிச்சை அளிக்கப்பட்டு வருகிறது.
இந்த விபத்து குறித்து பெரம்பூர் காவல் ஆய்வாளர் மலைச்சாமி வழக்குப் பதிவு செய்து, விசாரணை மேற்கொண்டு வருகிறார்.
