ஒடிசா மாநில அரசு தனது பள்ளி மாணவர்களுக்கு வழங்கிய புதிய பாடப்புத்தகங்களில் ஆயிரக்கணக்கான தவறுகள் இடம்பெற்றுள்ளிருப்பது பெரும் சர்ச்சையை ஏற்படுத்தியுள்ளது. குறிப்பாக, இயற்பியலின் தந்தை என்று அழைக்கப்படும் சர் ஐசக் நியூட்டனை, மிகச்சிறந்த விமானி என்று தவறாகக் குறிப்பிட்டிருப்பது கல்வி வட்டாரங்களில் கடும் விமர்சனங்களுக்கு உள்ளாகியுள்ளது.
தவறுகளின் எண்ணிக்கை மற்றும் விவரங்கள்
தேசிய கல்விக் கொள்கை 2020 மற்றும் ஒடிசா பாடத்திட்டக் கட்டமைப்பு 2025 ஆகியவற்றின் கீழ், நடப்பு கல்வியாண்டிற்காக 1 முதல் 8ஆம் வகுப்பு வரை வழங்கப்பட்ட புத்தகங்களில் மொத்தம் 1,678 பிழைகள் கண்டறியப்பட்டுள்ளன. இதில் அதிகப்படியான தவறுகள் 8ஆம் வகுப்பு புத்தகங்களில் இடம்பெற்றுள்ளன. அந்த வகுப்பிற்கு வழங்கப்பட்ட புத்தகங்களில் மட்டும் 705 பிழைகளும், 7ஆம் வகுப்பில் 387 பிழைகளும், 6ஆம் வகுப்பில் 289 பிழைகளும் பதிவாகியுள்ளன.
புவியியல் மற்றும் அரசியல் ரீதியான தவறுகளும் இதில் இடம்பெற்றுள்ளன. கர்நாடக சட்டமன்றத்தைப் பற்றி விவரிக்கும் இடத்தில் ஒடிசா சட்டமன்றம் என்று குறிப்பிடப்பட்டிருக்கும். மேலும், ஹம்பி கோயில் வளாகத்தைப் பற்றி விவரிக்கும் பகுதியில் கோனார்க் சூரியக் கோயில் என்று பெயர் மாற்றப்பட்டுள்ளது. கணிதம், அறிவியல், புவியியல், ஆங்கிலம், இந்தி, சமஸ்கிருதம் மற்றும் உருது உள்ளிட்ட ஐந்துக்கும் மேற்பட்ட பாடப்புத்தகங்களில் இத்தகைய குளறுபடிகள் கண்டறியப்பட்டுள்ளன.
கல்வி ஆராய்ச்சி மையத்தின் விளக்கம்
இந்த பாடப்புத்தகங்களைத் தயாரித்து அச்சிட்ட மாநிலக் கல்வி ஆராய்ச்சி மற்றும் பயிற்சி மன்றம் (SCERT) இது குறித்து விளக்கம் அளித்துள்ளது. புத்தகங்களை அச்சிடுவதற்கு மிகக் குறைந்த கால அவகாசமே கிடைத்ததே இத்தகைய தவறுகளுக்குக் காரணம் என்று அந்த மையம் தெரிவித்துள்ளது. இருப்பினும், வெறும் கால அவகாசக் குறைபாட்டை மட்டும் காரணமாகக் கூற முடியாது என்று கல்வியாளர்கள் கருத்து தெரிவிக்கின்றனர்.
மாணவர்களின் கல்வித் தரம் பாதிப்பு
இவற்றை வெறும் அச்சுப்பிழைகளாகக் கருத முடியாது என்றும், இது ஒடிசாவின் ஒட்டுமொத்தக் கல்வித் தரத்தையே கேள்விக்குள்ளாக்கியுள்ளதாகவும் சமூக ஆர்வலர்கள் குற்றம் சாட்டுகின்றனர். குறிப்பாக அறிவியல் மற்றும் புவியியல் சார்ந்த உண்மைத் திரிப்புகள் மாணவர்களின் புரிதலைப் பாதித்து, அவர்களைத் தவறான திசையில் வழிநடத்தக்கூடும் என்று கவலை தெரிவிக்கப்பட்டுள்ளது.
புதிய புத்தகங்களை மீண்டும் அச்சிட்டு வழங்க ஆறு மாதங்கள் ஆகும் என்பதால், தற்போதுள்ள புத்தகங்களைக் கொண்டே வகுப்புகளை நடத்துமாறு ஆசிரியர்களுக்கு அறிவுறுத்தப்பட்டுள்ளது. அதே சமயம், புத்தகங்களில் உள்ள பிழைகளை ஆசிரியர்களே சரிசெய்து மாணவர்களுக்குக் கற்பிக்குமாறு அறிவுறுத்தப்பட்டுள்ளது. அரசின் இந்த அணுகுமுறை மிகுந்த மெத்தனப்போக்கைக் காட்டுகிறது என்ற விமர்சனம் வலுத்து வருகிறது.