பசிபிக் பெருங்கடலின் மத்திய மற்றும் கிழக்கு பூமத்திய ரேகை பகுதிகளில் கடல் மேற்பரப்பு நீர் வழக்கத்திற்கு மாறாக வெப்பமடைவதால் ஏற்படும் ‘எல் நினோ’ நிகழ்வு, இந்தியப் பருவமழையை கடுமையாகப் பாதிக்க வாய்ப்புள்ளதாக வானிலை ஆய்வாளர்கள் எச்சரித்துள்ளனர். அமெரிக்காவின் தேசிய கடல் மற்றும் வளிமண்டல நிர்வாகத்தின் சமீபத்திய கணிப்புப்படி, கடல் மேற்பரப்பு வெப்பம் இயல்பை விட உயர்வதற்கு 63 சதவீத வாய்ப்புகள் உள்ளன. இதன் காரணமாக இந்த ஆண்டு எல் நினோ நிகழ்வு மிகவும் வலுவானதாக வகைப்படுத்தப்பட்டுள்ளது.
கடந்த 1951-ம் ஆண்டுக்குப் பிறகு இதுபோன்ற மிக வலுவான எல் நினோ நிகழ்வுகள் ஆறு முறை மட்டுமே பதிவாகியுள்ளன. இந்த வானிலை மாற்றம் நடப்பு ஆண்டு முழுவதும் நீடித்து, நவம்பர் மற்றும் டிசம்பர் மாதங்களில் உச்சத்தை எட்டி, அடுத்த ஆண்டு மார்ச் மாதம் வரை தொடரும் என்று கணிக்கப்பட்டுள்ளது. இந்தியாவின் மொத்த மழைப்பொழிவில் சுமார் 75 சதவீதம் ஜூன் முதல் செப்டம்பர் வரையிலான தென்மேற்கு பருவமழை காலத்திலேயே கிடைக்கிறது என்பது குறிப்பிடத்தக்கது.
விவசாயத்தில் ஏற்படக்கூடிய பாதிப்புகள்
வரலாற்றுத் தரவுகளைக் கவனித்தால், 1951-ம் ஆண்டிலிருந்து ஏற்பட்ட 17 எல் நினோ ஆண்டுகளில், 12 ஆண்டுகள் இந்தியாவில் இயல்பை விடக் குறைவான மழைப்பொழிவே பதிவாகியுள்ளது. இந்த வரிசையில், இந்த ஆண்டு ஒட்டுமொத்த மழையளவு நீண்டகால சராசரியின் 90 சதவீதமாக மட்டுமே இருக்கும் என்று இந்திய வானிலை ஆய்வு மையம் கணித்துள்ளது. இது உண்மையானால், 2015-ம் ஆண்டுக்கு பிறகு இந்தியாவின் மிக பலவீனமான பருவமழை ஆண்டாக இது அமையும்.
ஜூன் 4-ம் தேதி கேரளாவில் தொடங்கிய பருவமழை, கடந்த 15-ம் தேதி வரையிலான கணக்கீட்டின்படி 32 சதவீத மழைப்பற்றாக்குறையை ஏற்படுத்தியுள்ளது. இந்த நிலை நீடித்தால், காரீப் பருவப் பயிர்களின் சாகுபடி பெருமளவில் பாதிக்கப்படும். அரிசி கையிருப்பு போதுமான அளவில் இருப்பதால் தட்டுப்பாட்டை ஓரளவுக்குச் சமாளிக்க முடியும் என்றாலும், மழையை மட்டுமே நம்பியிருக்கும் பருப்பு வகைகள் மற்றும் எண்ணெய் வித்துப் பயிர்கள் கடுமையாகப் பாதிக்கப்படும் சூழல் உள்ளது.
பொருளாதாரத் தாக்கம் மற்றும் விலைவாசி உயர்வு
நீண்டகால வறட்சியும், கடும் வெப்பமும் பயிர்களில் பூச்சித் தாக்குதலை அதிகரிக்கும். இதனால் காய்கறி விளைச்சல் குறையும் அபாயம் உள்ளது. அதேபோல், கால்நடைகளுக்கான தீவனப் பற்றாக்குறை ஏற்பட்டு பால் உற்பத்தி குறையக்கூடும். இதன் நேரடி விளைவாக, கடந்த ஜனவரியில் 2.1 சதவீதமாக இருந்த சில்லரை உணவு பணவீக்கம், மே மாதத்தில் 4.8 சதவீதமாக உயர்ந்துள்ளது. எல் நினோ தாக்கம் தொடர்ந்தால், உணவுப் பொருட்களின் விலை மேலும் அதிகரிக்கக்கூடும் என்று பொருளாதார நிபுணர்கள் கவலை தெரிவித்துள்ளனர்.
குடிநீர் மற்றும் மின்சாரத் தட்டுப்பாடு
பருவமழை குறைவதால் நிலத்தடி நீர்மட்டம் உயர்வதில்லை. இது குடியிருப்புகள் மற்றும் தொழிற்சாலைகளுக்குத் தேவையான குடிநீர் விநியோகத்தைப் பாதிக்கும். 2016-ம் ஆண்டு நிலவிய வறட்சியைப் போல, வரும் கோடைக்காலத்தில் பல பகுதிகளில் கடுமையான தண்ணீர் பற்றாக்குறை ஏற்படும் அபாயம் உள்ளது. மேலும், அணைக்கட்டுகளில் நீர்வரத்து குறைந்தால் நீர்மின் நிலையங்களின் மின் உற்பத்தி பாதிக்கப்பட்டு, மின்சாரத் தடை ஏற்படும் சூழல் உருவாகலாம்.
அடுத்த ஆண்டு வரை இந்த வானிலை மாற்றம் நீடிக்க வாய்ப்புள்ளதால், வழக்கத்தை விட கோடைக்கால வெப்பத்தின் தாக்கம் மிக உக்கிரமாக இருக்கும் என்று விஞ்ஞானிகள் எச்சரித்துள்ளனர்.