அவ்னி மூவிஸ் தயாரிப்பு நிறுவனத்தின் சார்பில் குஷ்புவின் மகள் அனந்திதா தயாரித்து, அஷ்வின் கந்தசாமி இயக்கத்தில் உருவாகியுள்ள திரைப்படம் ‘டபுள் ஆக்குபன்சி’. இதில் சந்தோஷ், ரேஷ்மா வெங்கடேஷ், சம்யுக்தா விஸ்வநாதன் மற்றும் வினோத் கிஷன் உள்ளிட்டோர் முக்கிய கதாபாத்திரங்களில் நடித்துள்ளனர். இத்திரைப்படம் மிக விரைவில் திரையரங்குகளில் வெளியாக உள்ளது.
நடனத்தை தாண்டி நடிப்புத் துறையில் அங்கீகாரம்
இந்தத் திரைப்படம் குறித்த தனது எதிர்பார்ப்புகளைப் பகிர்ந்து கொண்ட சம்யுக்தா விஸ்வநாதன், தனது திரைப்பயணம் குறித்த சில முக்கியத் தகவல்களைக் கூறினார். சாய் அபயங்கரின் ‘கட்சி சேர…’ என்ற இசை ஆல்பத்தின் மூலம் தனது நடனத் திறமையால் அனைவரின் கவனத்தையும் ஈர்த்ததாகவும், அதன் பிறகு பல இசை ஆல்பங்கள் மற்றும் குறும்படங்களில் வாய்ப்புகள் வந்ததாகவும் அவர் தெரிவித்தார்.
தொடர்ந்து பேசிய அவர், “சினிமாவில் நடிப்பதில் எனக்கு மிகுந்த விருப்பம் உள்ளது. கடந்த மூன்று ஆண்டுகளாகப் பல படங்களில் நடித்துள்ளேன். ஆனால், எதிர்பாராத சில காரணங்களால் அந்தப் படங்கள் இன்னும் வெளியாகவில்லை. அவை ஒவ்வொன்றாக விரைவில் வெளியாகும் என்று நம்புகிறேன்” என்றார்.
மேலும், ரசிகர்கள் தன்னை ஒரு சிறந்த நடனக் கலைஞராக மட்டுமே பார்க்கிறார்கள் என்றும், ‘டபுள் ஆக்குபன்சி’ படத்தின் மூலம் தனது நடிப்புத் திறமையை வெளிப்படுத்துவேன் என்றும் அவர் கூறினார். நடனம் என்ற அடையாளத்தைத் தாண்டி, ஒரு சிறந்த நடிகை என்ற அங்கீகாரத்தைப் பெற வேண்டும் என்பதே தனது விருப்பம் என சம்யுக்தா விஸ்வநாதன் குறிப்பிட்டார்.
நடிகர் சந்தோஷின் எதிர்பார்ப்பு
இதேபோல், இப்படத்தில் நடித்துள்ள நடிகர் சந்தோஷ் கூறுகையில், ஏற்கனவே ஒரு சில படங்களில் நடித்திருந்தாலும், ‘டபுள் ஆக்குபன்சி’ திரைப்படம் தனது சினிமா வாழ்க்கையில் ஒரு நல்ல திருப்புமுனையாக அமையும் என்றும், இதன் மூலம் ஒரு நல்ல பெயரைப் பெறுவேன் என்றும் தனது நம்பிக்கையை வெளிப்படுத்தினார்.