நீலகிரி மாவட்டம் கோத்தகிரி அருகே உள்ள கன்னிகா தேவி காலனி பகுதியில் கரடிகள் அடிக்கடி நடமாடுவதால் அப்பகுதி மக்கள் மிகுந்த அச்சத்தில் உள்ளனர். குறிப்பாக, குடியிருப்புகள் மற்றும் பொதுமக்களின் நடமாட்டம் அதிகம் உள்ள பகுதிகளில் வனவிலங்குகள் நுழைவது தொடர்கதையாகி வருகிறது.
குட்டிகளுடன் கரடி உலா
கடந்த இரண்டு நாட்களுக்கு முன்பு, கன்னிகா தேவி காலனி குடியிருப்பு பகுதியில் உள்ள தேயிலை தோட்டத்தை ஒட்டிய நடைபாதையில் ஒரு தாய் கரடி தனது முதுகில் இரண்டு குட்டிகளை சுமந்து கொண்டு நடந்து சென்றது. இந்த காட்சியை நேரில் பார்த்த தேயிலை பறிப்பு தொழிலாளர்கள் மற்றும் வழிப்போக்கர்கள் அதிர்ச்சியடைந்தனர்.
கரடியைக் கண்ட பொதுமக்கள் சத்தம் போட்டு அதனை விரட்ட முயற்சித்தனர். அப்போது, அந்த கரடி சிறிது நேரம் தனது குட்டிகளுடன் நடைபாதையிலேயே அமர்ந்திருந்தது. பின்னர், மீண்டும் தனது குட்டிகளை முதுகில் சுமந்தவாறு வந்த வழியாகவே திரும்பிச் சென்று, அருகிலிருந்த தேயிலை தோட்டத்திற்குள் மறைந்தது.
தொடரும் வனவிலங்கு பாதிப்புகள்
இந்த பகுதியில் கடந்த இரண்டு ஆண்டுகளாக கரடிகளின் நடமாட்டம் அதிகரித்துள்ளது. நகராட்சி வளம் மீட்பு பூங்கா மற்றும் குடியிருப்பு பகுதிகளில் கரடிகள் அடிக்கடி தென்படுவதாக மக்கள் தெரிவிக்கின்றனர். முன்னதாக, வனத்துறை அதிகாரிகள் இப்பகுதியில் இரண்டு முறை கூண்டுகள் வைத்து கரடிகளைப் பிடித்தனர். பிடிபட்ட கரடிகள் தலைகுந்தா பகுதியில் உள்ள அடர்ந்த வனப்பகுதிக்குள் கொண்டு செல்லப்பட்டு விடுவிக்கப்பட்டன.
வனத்துறைக்கு கோரிக்கை
வனத்துறையினரின் நடவடிக்கைக்குப் பிறகும் கரடிகளின் நடமாட்டம் குறையாததால், மக்கள் அச்சத்தோடு தங்கள் அன்றாட பணிகளை மேற்கொண்டு வருகின்றனர். குறிப்பாக தேயிலை தோட்டங்களில் வேலை செய்யும் தொழிலாளர்களின் பாதுகாப்பு கேள்விக்குறியாக உள்ளது.
எனவே, குடியிருப்பு பகுதிகளுக்குள் நுழையும் கரடிகளை உடனடியாகக் கூண்டு வைத்துப் பிடித்து, பாதுகாப்பான வனப்பகுதிக்கு மாற்ற வனத்துறை அதிகாரிகள் உரிய நடவடிக்கை எடுக்க வேண்டும் என்று அப்பகுதி மக்கள் வலியுறுத்தியுள்ளனர்.