தமிழகத்தில் த.வெ.க ஆட்சியை கவிழ்க்கும் நோக்கில், அந்த கட்சியின் சட்டமன்ற உறுப்பினர்களிடம் பெரும் தொகைக்கு பேரம் பேசியதாக எழுந்த புகாரின் அடிப்படையில் விசாரணை மேற்கொள்ளப்பட்டு வருகிறது. இந்த வழக்கில் முன்னாள் அமைச்சர் செந்தில் பாலாஜி மற்றும் அவரது சகோதரர் அசோக்குமார் ஆகிய இருவருக்கும் சென்னை காவல்துறை லுக் அவுட் நோட்டீஸ் வழங்கியுள்ளது.
புகார் மற்றும் தொடக்கப்புள்ளி
ஊத்தங்கரை தொகுதி த.வெ.க சட்டமன்ற உறுப்பினர் டாக்டர் இளையராஜா, சென்னை காவல்துறை ஆணையர் அலுவலகத்தில் அளித்த புகார் மனுவே இந்த விசாரணைக்கு தொடக்கப்புள்ளியானது. அந்த மனுவில், த.வெ.க அரசை கவிழ்க்கும் முயற்சியாக தன்னிடம் 35 கோடி ரூபாய் வழங்கப்பட்டு பேரம் பேசப்பட்டதாக அவர் குறிப்பிட்டிருந்தார்.
கைது நடவடிக்கை மற்றும் வாக்குமூலம்
இளையராஜா அளித்த புகாரின் அடிப்படையில், தேர்தல் கருத்து கணிப்பு நிறுவனமான ஐ.பி.டி.எஸ் நிறுவனத்தின் நிறுவனர் திருநாவுக்கரசு உட்பட எட்டு பேரை காவல்துறை கைது செய்தது. கைது செய்யப்பட்டவர்களில் மேடவாக்கத்தைச் சேர்ந்த தியாகராஜன், பெசன்ட்நகரைச் சேர்ந்த நரேஷ், கரூர் மாவட்டத்தைச் சேர்ந்த ரமேஷ், கார்த்தி மற்றும் சென்னை பள்ளிக்கரணை, மணப்பாக்கம், அஸ்தினாபுரம் ஆகிய பகுதிகளில் உள்ள பிரமுகர்கள் அடங்குவர்.
கைது செய்யப்பட்டவர்களிடம் நடத்தப்பட்ட விசாரணையில், த.வெ.க ஆட்சியை கவிழ்க்கும் நோக்கில் சட்டமன்ற உறுப்பினர்களை விலைக்கு வாங்க மொத்தம் 180 கோடி ரூபாய் ஒதுக்கி சதித்திட்டம் தீட்டப்பட்டதாக வாக்குமூலம் அளித்துள்ளனர். இந்த தகவல்கள் தற்போது அரசியல் வட்டாரத்தில் பெரும் விவாதத்தை ஏற்படுத்தியுள்ளது.
சம்மன் மற்றும் தலைமறைவு
விசாரணையின் ஒரு பகுதியாக, முன்னாள் அமைச்சர் செந்தில் பாலாஜி மற்றும் அவரது சகோதரர் அசோக்குமார் ஆகியோரை விசாரணைக்கு ஆஜராகக் கோரி சென்னை காவல்துறை சம்மன் அனுப்பியது. கரூர் மாவட்டம் ராமேஸ்வரபட்டியில் உள்ள அவர்களது பூர்வீக இல்லத்திற்குச் சென்ற காவல்துறையினர், அந்த சம்மனை செந்தில் பாலாஜியின் தந்தையிடம் வழங்கினர். வரும் ஜூலை 6-ஆம் தேதி ஆஜராகுமாறு அதில் குறிப்பிடப்பட்டிருந்தது.
இருப்பினும், செந்தில் பாலாஜி மற்றும் அசோக்குமார் ஆகிய இருவரும் விசாரணைக்கு ஆஜராகவில்லை. அவர்கள் தற்போது தலைமறைவாக உள்ளதாக திருவல்லிக்கேணி காவல்துறை தெரிவித்துள்ளது. இதன் காரணமாகவே, அவர்கள் வெளிநாடுகளுக்குத் தப்பிச் செல்வதைத் தடுக்க லுக் அவுட் நோட்டீஸ் அனுப்பப்பட்டுள்ளது.