தமிழ்நாட்டின் மொத்தக் கருவுறுதல் விகிதம் கணிசமாகக் குறைந்து வருவதால், மூன்றாவது குழந்தையை பெற்றுக்கொள்ளும் குடும்பங்களுக்கு அரசு சலுகைகளை அறிவிக்க வேண்டும் என்று விசிக நாடாளுமன்ற உறுப்பினர் ரவிக்குமார் கோரிக்கை விடுத்துள்ளார். இது குறித்து மக்கள் நல்வாழ்வுத்துறை அமைச்சர் அருண்ராஜு அவர்களுக்கு அவர் அனுப்பியுள்ள கடிதத்தில் விரிவான கருத்துக்களைத் தெரிவித்துள்ளார்.
தேசிய குடும்ப சுகாதார சர்வே அறிக்கையின் தாக்கம்
சமீபத்தில் வெளியாகியுள்ள 2023-24ஆம் ஆண்டுக்கான தேசிய குடும்ப சுகாதார சர்வே (NFHS-6) அறிக்கையில் இடம்பெற்றுள்ள தகவல்கள் கவலைக்குரியதாக இருப்பதாக ரவிக்குமார் குறிப்பிட்டுள்ளார். இந்திய அளவில் மொத்தக் கருவுறுதல் விகிதம் 2.0 என்ற அளவில் இருக்கும்போது, தமிழ்நாட்டில் அது 1.7 ஆக வீழ்ச்சியடைந்துள்ளது. இந்த சரிவு வரும் காலங்களில் மாநிலத்தின் மக்கள் தொகை கட்டமைப்பில் பெரும் பாதிப்புகளை ஏற்படுத்தும் என்று அவர் எச்சரித்துள்ளார்.
மக்கள் தொகை சமநிலை குறித்து
ஒரு பெண்ணுக்குச் சராசரியாக 2.1 குழந்தைகள் என்ற கருவுறுதல் விகிதமே மக்கள் தொகை சமநிலைக்கு ஏற்றது என்று அவர் தனது கடிதத்தில் விளக்கியுள்ளார். இந்த விகிதத்தில்தான் ஒரு தலைமுறை தனது அடுத்த தலைமுறையை ஈடுகட்டி, மக்கள் தொகை குறைப்பின்றித் தொடர முடியும். ஆனால், தமிழ்நாட்டில் இந்த அளவு மிகக்குறைவாக உள்ளது.
மத்திய நிதிப் பகிர்விலும் தொகுதி மறுசீரமைப்பிலும் பாதிப்பு
இந்தியாவின் பிற மாநிலங்களுடன் ஒப்பிடுகையில் தமிழ்நாட்டின் இந்த நிலை பொருளாதார ரீதியாகவும் அரசியல் ரீதியாகவும் பாதிப்பை ஏற்படுத்தும் என்று அவர் சுட்டிக்காட்டியுள்ளார். உதாரணமாக, உத்தரப்பிரதேசத்தில் கருவுறுதல் விகிதம் 2.2 ஆகவும், பீகாரில் 2.7 ஆகவும் உள்ளது. மக்கள் தொகை அடிப்படையில் மத்திய அரசு நிதி ஒதுக்கீடு செய்வதாலும், எதிர்காலத்தில் தொகுதி மறுசீரமைப்பு நடவடிக்கைகளில் ஈடுபடுவதாலும், இந்த மாநிலங்களே அதிக பலன்களைப் பெறும் சூழல் உருவாகும் என்று அவர் குறிப்பிட்டுள்ளார்.
கருத்தடை அறுவை சிகிச்சைகளின் தாக்கம்
தமிழ்நாட்டின் கருவுறுதல் விகித சரிவுக்கு இயற்கையான காரணங்களை விட, கருத்தடை அறுவை சிகிச்சைகளின் தாக்கம் அதிகமாக இருப்பதாக ரவிக்குமார் தெரிவித்துள்ளார். தேசிய அளவில் கருத்தடை செய்து கொள்பவர்களின் விகிதம் 36.5 சதவீரமாக இருக்கும் நிலையில், தமிழ்நாட்டில் அது 56.6 சதவீதமாக உயர்ந்துள்ளது. குறிப்பாக, ஆண்களின் கருத்தடை விகிதமும் தேசிய சராசரியை விட இரண்டு மடங்கு அதிகமாக இருப்பது குறிப்பிடத்தக்கது.
எனவே, இந்த சரிவைத் தடுத்து நிறுத்த தமிழ்நாடு அரசு உடனடியாக தலையிட வேண்டும் என்றும், மூன்றாவது குழந்தை பெற்றுக்கொள்ளும் பெற்றோருக்கு உரிய சலுகைகளை அறிவிக்க வேண்டும் என்றும், மேலும் கருத்தடை முறைகளைக் குறைப்பதற்கான விழிப்புணர்வு மற்றும் நடவடிக்கைகளை மேற்கொள்ள வேண்டும் என்றும் அவர் தனது கடிதத்தில் வலியுறுத்தியுள்ளார்.
