சென்னை: தமிழக சட்டசபை தேர்தல் ஓட்டுப்பதிவு முடிந்த நிலையில், வாரவிடுமுறை கொண்டாட்டங்களுக்காக சொந்த ஊர் சென்ற மக்கள் சென்னை திரும்பி வருவதால் சிங்கபெருமாள் கோவில் பகுதியில் 2 கிமீ தூரத்திற்கு வாகனங்கள் அணிவகுத்து காத்திருக்கின்றன. இதனால் அப்பகுதியில் கடும் போக்குவரத்து நெரிசல் காணப்படுகிறது.
போக்குவரத்து நெரிசல் ஏன்?
தமிழக சட்டசபை தேர்தல் ஒட்டுப்பதிவு மற்றும் வாரவிடுமுறை கொண்டாட்டங்களுக்காக சொந்த ஊர் சென்ற மக்கள், நாளை (ஏப்.27) அலுவலகங்களுக்குச் செல்ல வேண்டி இருப்பதால் தற்போது சென்னை நோக்கி திரும்பி வருகின்றனர். ஒரே நாளில் திருச்சி, கடலூர், விழுப்புரம் மற்றும் தென் மற்றும் மேற்கு மாவட்டங்களில் இருந்து ஆயிரக்கணக்கானோர் சென்னையை நோக்கி பயணித்து வருகின்றனர்.
இதன் காரணமாக, செங்கல்பட்டு மாவட்டம், சிங்கப்பெருமாள் கோவில் பகுதியில் இன்று (ஏப்.26) காலை முதலே போக்குவரத்து நெரிசல் உருவானது. குறிப்பாக திருச்சி-சென்னை தேசிய நெடுஞ்சாலையில் அரசு விரைவு பஸ்கள், ஆம்னி பஸ்கள், கார்கள், மினி வேன்கள் சென்னை நோக்கி தொடர்ச்சியாக வந்த வண்ணம் உள்ளன.
பாதிப்புகள் மற்றும் நிவாரண நடவடிக்கைகள்
சிங்கப்பெருமாள் கோவில் முதல் திருத்தேரி வரை வாகனங்கள் ஊர்ந்து செல்ல ஆரம்பித்தன. கிட்டத்தட்ட 2 கிலோ மீட்டருக்கும் அதிகமாக வாகனங்கள் மெதுவாக சென்றதால் வாகன ஓட்டிகள் கடும் சிரமத்தை எதிர்கொண்டனர். பல பகுதிகளில் பணியில் உள்ள போலீசாரும் போக்குவரத்து நெரிசலை சீர்செய்து வருகின்றனர். ஆனாலும் தொடர்ந்து வாகனங்கள் சென்னை நோக்கி வந்து கொண்டே இருப்பதால் போக்குவரத்து நெரிசல் நீடிக்கிறது.
மாற்று வழி மற்றும் பொதுமக்களுக்கான அறிவுரை
சென்னை திரும்பும் மக்கள் மாற்று வழிகளை பயன்படுத்தவும், தேவையற்ற பயணங்களை தவிர்க்கவும் போக்குவரத்து துறை அதிகாரிகள் அறிவுறுத்தியுள்ளனர். மேலும், பொதுப் போக்குவரத்தை அதிகம் பயன்படுத்துமாறு வாகன ஓட்டிகளுக்கு அறிவுறுத்தப்பட்டுள்ளது. இந்த நெரிசல் நாள் முழுவதும் நீடிக்கும் என எதிர்பார்க்கப்படுகிறது.
