பஞ்சாப் மாநிலத்தின் பதான்கோட்-ஜம்மு தேசிய நெடுஞ்சாலை-44 பகுதியில், இந்திய ராணுவம் மற்றும் துணை ராணுவப்படையினரின் நகர்வுகளை ரகசியமாகக் கண்காணித்து வந்த நபர் ஒருவரை காவல்துறையினர் கைது செய்துள்ளனர். சக் தரிவால் கிராமத்தைச் சேர்ந்த பல்ஜித் சிங் என்ற நபர் இந்தச் செயலில் ஈடுபட்டது விசாரணையில் தெரியவந்துள்ளது.
தேசிய நெடுஞ்சாலையில் உள்ள ஒரு பாலத்திற்கு அருகிலுள்ள கடையில், பல்ஜித் சிங் சிசிடிவி கேமராக்களைப் பொருத்தியிருந்தார். இதன் மூலம் ராணுவ வாகனங்கள் மற்றும் வீரர்களின் நடமாட்டத்தைத் தொடர்ந்து கண்காணித்து வந்த அவர், அந்த காட்சிகளை இணையதளம் வழியாக பாகிஸ்தான் மற்றும் பிற வெளிநாடுகளில் உள்ள நபர்களுக்கு அனுப்பி வந்துள்ளார்.
துபாயில் இருந்து நிதி உதவி
கைது செய்யப்பட்ட பல்ஜித் சிங்கிடம் காவல்துறையினர் நடத்திய தீவிர விசாரணையில் அதிர்ச்சியூட்டும் தகவல்கள் வெளியாகியுள்ளன. கடந்த ஜனவரி மாதம் சுஜன்பூர் பகுதியில் உள்ள ஒரு கடையில், இணைய வசதியுடன் கூடிய சிசிடிவி கேமராக்களைப் பொருத்தியதை அவர் ஒப்புக்கொண்டார். இதற்கான வழிமுறைகளை துபாயில் இருக்கும் அடையாளம் தெரியாத நபர் ஒருவரிடமிருந்து பெற்றதாகவும், அதற்காக ரூ.40 ஆயிரம் பணம் பெற்றதாகவும் அவர் தெரிவித்துள்ளார்.
இந்த வழக்கில் தொடர்புடைய சிசிடிவி கேமராக்கள் மற்றும் இணைய வைஃபை ரூட்டரை காவல்துறையினர் பறிமுதல் செய்துள்ளனர்.
ரகசியத் தகவல் மற்றும் அதிரடி நடவடிக்கை
பதான்கோட்-ஜம்மு நெடுஞ்சாலைப் பகுதியில் சந்தேகத்திற்கிடமான நடவடிக்கைகள் நடைபெறுவதாக சுஜன்பூர் காவல்துறைக்கு ரகசியத் தகவல் கிடைத்தது. இதைத் தொடர்ந்து அதிகாரிகள் மேற்கொண்ட தீவிர கண்காணிப்பிற்குப் பிறகு, இந்த உளவுவலையை அடையாளம் கண்டு பல்ஜித் சிங்கைக் கைது செய்தனர்.
இந்த உளவு நெட்வொர்க்கிற்கு பாகிஸ்தானில் இருந்து வழங்கப்பட்ட நிதி ஆதாரங்கள் என்ன என்பது குறித்தும், இதில் தொடர்புடைய மற்ற நபர்கள் யார் என்பது குறித்தும் விசாரணைத் தொடர்கிறது. தலைமறைவாக உள்ள மற்ற நபர்களைக் கைது செய்ய காவல்துறையினர் தீவிர முயற்சி எடுத்து வருகின்றனர்.
