தமிழ் சினிமாவில் வெண்ணிலா கபடி குழு மூலம் அறிமுகமான விஷ்ணு விஷால், குள்ளநரி கூட்டம், நீர்ப்பறவை, முண்டாசுப்பட்டி, ராட்சசன் உள்ளிட்ட பல படங்களில் நடித்து ரசிகர்கள் மத்தியில் நல்ல வரவேற்பைப் பெற்றுள்ளார். இவரது நடிப்பில் கடைசியாக வெளியான ஆர்யன் படம் நல்ல வரவேற்பைப் பெற்றது. தற்போது, அவர் மீண்டும் இயக்குனர் ராம் குமாருடன் இணைந்துள்ளார்.
இரண்டு வானம் பட விபரங்கள்
‘முண்டாசுப்பட்டி’ மற்றும் ‘ராட்சசன்’ பட இயக்குனர் ராம் குமார் இயக்கத்தில், விஷ்ணு விஷால் மூன்றாவது முறையாக இணைந்து நடித்துள்ளார். ‘இரண்டு வானம்’ என பெயரிடப்பட்ட இப்படத்தில், தென் இந்திய திரையுலகில் வேகமாக முன்னேறி வரும் மமிதா பைஜு நாயகியாக நடித்துள்ளார். திபு நினன் தாமஸ் இப்படத்திற்கு இசையமைக்கிறார். படத்தின் படப்பிடிப்பு கொடைக்கானல் உள்ளிட்ட பகுதிகளில் நடைபெற்று, சமீபத்தில் நிறைவடைந்தது.
முதல் பாடல் ‘வெள்ளிச்சுடரே’ வெளியீடு
இந்த நிலையில், ‘இரண்டு வானம்’ படத்தின் முதல் பாடலான ‘வெள்ளிச்சுடரே’ வெளியிடப்பட்டுள்ளது. பாடலாசிரியர் மதராஜே எழுதிய வரிகளுக்கு, கபில் கபிலன் பாடியுள்ளார். இப்பாடல் வெளியானவுடன் ரசிகர்கள் மத்தியில் நல்ல வரவேற்பைப் பெற்று வருகிறது. படக்குழு இப்படத்தை கோடை காலத்தில் வெளியிட திட்டமிட்டுள்ளதாக தகவல் வெளியாகியுள்ளது.