மத்திய அரசின் கட்டுப்பாட்டில் இயங்கும் பாரத ஸ்டேட் வங்கி (SBI), சாமானிய மக்களும் எளிதாக முதலீடு செய்யும் வகையில் பல்வேறு திட்டங்களை அறிமுகப்படுத்தி வருகிறது. அந்த வரிசையில், குறைந்தபட்ச முதலீட்டுத் தொகையை கொண்டு குழந்தைகளின் எதிர்காலத்தை மேம்படுத்தும் நோக்கில் ‘ஜன்-நிவேஷ்’ (Jan Nivesh) எனும் சிறப்பு முதலீட்டுத் திட்டத்தை செயல்படுத்தியுள்ளது.
சிறு சேமிப்பாளர்களுக்கான வாய்ப்பு
பொதுவாக மியூச்சுவல் ஃபண்ட் முதலீடுகள் அதிகத் தொகையுடன் தொடங்கும் என்ற பிம்பத்தை உடைக்க இந்தத் திட்டம் உருவாக்கப்பட்டுள்ளது. குறிப்பாக கிராமப்புற மற்றும் நகர்ப்புறங்களில் உள்ள சிறு சேமிப்பாளர்கள் மற்றும் முதல்முறையாக முதலீடு செய்பவர்களை ஊக்குவிப்பதே இதன் முக்கிய நோக்கமாகும். இந்தத் திட்டத்தின் கீழ், மாதம் வெறும் 250 ரூபாயிலிருந்து முதலீட்டைத் தொடங்க முடியும்.
முதலீட்டு முறை மற்றும் செயல்பாடு
இந்த ஜன்-நிவேஷ் திட்டத்தின் மூலம் முதலீடு செய்யப்படும் தொகை, ‘எஸ்பிஐ பேலன்ஸ்டு அட்வான்டேஜ் ஃபண்ட்’ (SBI Balanced Advantage Fund) எனும் கலப்பு வகை நிதியில் முதலீடு செய்யப்படுகிறது. இதில் பங்குச்சந்தை மற்றும் கடன் பத்திரங்கள் ஆகிய இரண்டிலும் முதலீடுகள் பகிர்ந்தளிக்கப்படுகின்றன. சந்தை நிலவரத்திற்கு ஏற்ப, நிதி மேலாளர்கள் முதலீடுகளை மாற்றி அமைப்பதன் மூலம் அதிக லாபம் ஈட்ட வழிவகை செய்யப்பட்டுள்ளது.
முதலீட்டாளர்கள் தங்கள் வசதிக்கேற்ப தினசரி, வாராந்திர அல்லது மாதாந்திர அடிப்படையில் பணத்தைச் செலுத்த விருப்பங்களைத் தேர்வு செய்யலாம்.
எதிர்பார்க்கப்படும் வருமானம்
நீண்ட கால முதலீடாக இதை அணுகும்போது, கூட்டு வட்டியின் மூலம் மிகப்பெரிய தொகையைச் சேர்க்க முடியும். உதாரணமாக, ஒரு முதலீட்டாளர் 30 ஆண்டுகாலத்திற்கு மாதம் 250 ரூபாயை முதலீடு செய்து, சராசரியாக 15% வருமானம் பெற்றால், அவர் சுமார் 17.30 லட்சம் ரூபாயை ஈட்ட முடியும்.
அதேபோல், முதலீட்டுக் காலத்தை 40 ஆண்டுகளாக நீட்டிக்கும் பட்சத்தில், இதே 250 ரூபாய் மாத முதலீடு மூலம் சுமார் 78 லட்சம் ரூபாய் வரையிலான பெரும் நிதியை உருவாக்க முடியும் என கணிக்கப்பட்டுள்ளது. முதலீட்டு கால அளவு மற்றும் சந்தை வருவாய் விகிதத்தைப் பொறுத்து இந்தத் தொகை மாறுபடும் என்பது குறிப்பிடத்தக்கது.
பெற்றோர்களுக்குக் கிடைத்த வாய்ப்பு
குழந்தைகளின் உயர்கல்வி மற்றும் திருமணச் செலவுகளுக்காக இப்போதே திட்டமிடும் பெற்றோர்களுக்கு இந்தத் திட்டம் பெரும் உதவியாக இருக்கும். குறைந்தபட்சத் தொகையில் தொடங்கி, நீண்ட கால அடிப்படையில் ஒரு பெரிய மூலதனத்தை உருவாக்குவது இதன் சிறப்பம்சமாகும்.