தமிழக அரசின் உயர்மட்ட ரகசியங்கள் மற்றும் அமைச்சரவை ஆலோசனைகளில் அரசுப் பணியில் இல்லாத தனி நபர்கள் பங்கேற்பது சட்டவிரோதமானது என்று கூறி, தமிழக காவல்துறை தலைமை இயக்குநருக்கு திமுக சார்பில் புகார் அளிக்கப்பட்டுள்ளது.
ரகசிய காப்பு உறுதிமொழி மீறல் குற்றச்சாட்டு
திமுக அமைப்புச் செயலர் பாரதி அவர்கள் மின்னஞ்சல் வாயிலாக அளித்துள்ள புகாரில், முதலமைச்சர் விஜய் தலைமையில் நடைபெறும் அமைச்சரவை கூட்டங்கள், அதிகாரப்பூர்வ ஆய்வுக்கூட்டங்கள் மற்றும் தலைமைச் செயலகத்தில் நடக்கும் உயர்மட்ட ஆலோசனை கூட்டங்களில் ஜான் ஆரோக்கியசாமி மற்றும் விஷ்ணு ரெட்டி ஆகிய இருவரும் தொடர்ந்து பங்கேற்று வருவதாகக் குறிப்பிட்டுள்ளார்.
இந்திய அரசியலமைப்புச் சட்டத்தின்படி, மாநிலத்தின் மிக உயர்ந்த பொறுப்பை வகிக்கும் முதலமைச்சர், ரகசியக் காப்பு உறுதிமொழி எடுத்துக்கொண்டவர். எனவே, அமைச்சரவையின் நடவடிக்கைகள் மற்றும் அரசின் முக்கியத் தகவல்களைப் பாதுகாப்பது முதலமைச்சரின் சட்டப்பூர்வக் கடமையாகும். இத்தகைய சூழலில், அரசுப் பணியில் இல்லாதவர்கள் இக்கூட்டங்களில் கலந்துகொள்வது விதிகளுக்குப் புறம்பானது என்று புகாரில் தெரிவிக்கப்பட்டுள்ளது.
தகுதியின்மை குறித்து கேள்வி
ஆந்திர மாநிலத்தைச் சேர்ந்தவர்களாகக் கூறப்படும் ஜான் ஆரோக்கியசாமி மற்றும் விஷ்ணு ரெட்டி ஆகியோர், முதல்வரின் நெருங்கிய உதவியாளர்களாகச் செயல்பட்டு வருவதாகக் கூறப்படுகிறது. இவர்கள் இருவரும் தமிழக அரசின் பணிச்சட்ட விதிகளின் கீழ் ரகசிய அரசு நடவடிக்கைகளில் பங்கேற்கத் தகுதியுடையவர்களா என்ற கேள்வி எழுந்துள்ளதாக திமுக சார்பில் சுட்டிக்காட்டப்பட்டுள்ளது.
அரசின் ரகசியத் தகவல்கள் இவர்களின் மூலம் கசிவது அல்லது அவர்கள் பெறுவது குற்றச்செயல் என்பதால், இது குறித்து உரிய விசாரணை நடத்தி அவர்கள் மீது சட்டப்பூர்வமான நடவடிக்கை எடுக்க வேண்டும் என்றும், இத்தகைய சூழலை அனுமதித்த முதலமைச்சர் மீதும் நடவடிக்கை எடுக்க வேண்டும் என்றும் அந்தப் புகாரில் வலியுறுத்தப்பட்டுள்ளது.