தமிழகத்தில் தொடர்ச்சியாகப் பெண் குழந்தைகள் மற்றும் பெண்களுக்கு எதிரான பாலியல் வன்கொடுமைச் சம்பவங்கள் அரங்கேறி வருவது குறித்து அம்மா மக்கள் முன்னேற்றக் கழக பொதுச்செயலாளர் டி.டி.வி. தினகரன் தனது அறிக்கையை வெளியிட்டுள்ளார்.
விழுப்புரம் மாவட்டம் மரக்காணம் அருகே உள்ள வண்டிப்பாளையம் பகுதியில், 11 வயது சிறுமி ஒருவர் பாலியல் ரீதியாக வன்கொடுமை செய்யப்பட்ட சம்பவம் குறித்து அவர் தனது அறிக்கையில் குறிப்பிட்டிருந்தார். இந்த வழக்கில் தொடர்புடைய நபர் கைது செய்யப்பட்டுள்ளதாக ஊடகங்களில் செய்திகள் வெளியாகியுள்ள நிலையில், இது போன்ற சம்பவங்கள் தொடர்வது கவலையளிப்பதாக அவர் தெரிவித்துள்ளார்.
பாதுகாப்பு குறித்த கேள்வி
முன்னதாக, கோவை மாவட்டம் சூலூர் அருகே 10 வயது சிறுமி கடத்தப்பட்டு, பாலியல் வன்கொடுமைக்கு உள்ளாக்கப்பட்டு கொடூரமாகக் கொலை செய்யப்பட்ட சம்பவம் பெரும் அதிர்ச்சியை ஏற்படுத்தியது. அந்த நிகழ்வின் தாக்கங்கள் முழுமையாக நீங்குவதற்கு முன்பே, தற்போது மரக்காணத்தில் இத்தகைய சம்பவம் நிகழ்ந்துள்ளதைக் குறிப்பிட்ட தினகரன், தமிழகத்தில் பெண் குழந்தைகளின் பாதுகாப்பு தற்போது கேள்விக்குறியாகியுள்ளதாகக் குற்றம் சாட்டியுள்ளார்.
முதலமைச்சரின் நிலைப்பாடு குறித்து விமர்சனம்
அண்ணா பல்கலைக்கழக மாணவி பாலியல் வன்கொடுமைக்கு உள்ளானபோது, அனைத்துத் தங்கைகளுக்கும் அண்ணனாகவும், அரணாகவும் இருந்து பாதுகாப்பேன் என்று ஜோசப் விஜய் கடிதம் எழுதியிருந்தது நினைவூட்டப்பட்டுள்ளது. ஆனால், தற்போது அவர் முதலமைச்சர் பொறுப்பை ஏற்ற பிறகு, அன்றாடம் அரங்கேறும் பெண்களுக்கு எதிரான குற்றச்சம்பவங்களைக் கண்டும் காணாமல் மௌனம் காப்பது ஏன் என்று டி.டி.வி. தினகரன் கேள்வி எழுப்பியுள்ளார்.
சிறுமியை பாலியல் வன்கொடுமைக்கு உள்ளாக்கிய குற்றவாளிக்கு சட்டப்படி உச்சபட்சத் தண்டனையை பெற்றுத் தர வேண்டும் என்று அவர் வலியுறுத்தியுள்ளார். மேலும், தனது ஆட்சியைப் பாதுகாப்பதில் செலுத்தும் கவனத்தை, மாநிலத்திலுள்ள குழந்தைகள் மற்றும் பெண்களின் பாதுகாப்பிலும் முதலமைச்சர் செலுத்த வேண்டும் என்றும் அவர் தனது அறிக்கையில் குறிப்பிட்டுள்ளார்.
