சூர்யா நடிப்பில் ஆர்.ஜே. பாலாஜி இயக்கிய ‘கருப்பு’ திரைப்படம் கடந்த மே 15-ஆம் தேதி திரையரங்குகளில் வெளியானது. வெளியீட்டிலிருந்து தற்போது வரை வசூலில் சிறப்பான முன்னேற்றத்தைக் குறித்து வரும் இப்படம், ரசிகர்களிடையே பெரும் வரவேற்பைப் பெற்றுள்ளது.
திருப்பூரில் உள்ள ஸ்ரீ சக்தி சினிமாஸ் திரையரங்கிற்கு இன்று நேரில் சென்ற ஆர்.ஜே. பாலாஜி, அங்கு கூடியிருந்த செய்தியாளர்களிடம் உரையாடினார். அப்போது படத்தின் வெற்றி மற்றும் ரசிகர்கள் கொண்டாடும் விதம் குறித்து தனது கருத்துக்களைப் பகிர்ந்து கொண்டார்.
மக்களின் பக்தி மற்றும் வரவேற்பு
தன்னுடைய இயல்பான பக்தி உணர்வை குறிப்பிட்ட பாலாஜி, “எனக்கு இறைபக்தியில் அதிக நம்பிக்கை உண்டு. அதேபோல் மக்களுக்கும் அந்த உணர்வு அதிகம் என்பதை திரையரங்குகளில் படம் பார்க்கும் போது உணர முடிகிறது. இதுவரை இரண்டு ஆன்மீகப் படங்கள் செய்திருக்கிறேன். ஒரு படைப்பு நேர்மையாகவும் தரமாகவும் இருந்தால் அது மக்களின் மனதில் நீங்காத இடம் பிடிக்கும் என்று நம்புகிறேன்” என்றார்.
கருப்பசாமியின் சிறப்பை விளக்கிய அவர், “கருப்பசாமி நமது ஊர்களின் எல்லைக் காவல் தெய்வம். சாதி, மத எல்லைகள் கடந்து அனைவரும் வணங்கும் ஒரு கடவுள் அவர். மக்கள் தங்கள் கிராமத்தை விட்டு வெளியே செல்லும்போதும், மீண்டும் ஊருக்குள் நுழையும்போதும் கருப்பசாமியை வணங்குவது வழக்கம். அந்த உணர்வே திரையரங்குகளில் பிரதிபலிப்பதாகத் தெரிகிறது. மக்கள் இந்தப் படத்தை ஒரு திரைப்படமாக மட்டும் பார்க்காமல், தங்கள் நம்பிக்கையோடு இணைத்துக் கொண்டாடுவது மகிழ்ச்சியளிக்கிறது” என்று தெரிவித்தார்.
விமர்சனங்கள் குறித்த பதில்
இணையதள விமர்சனங்கள் குறித்துப் பேசிய இயக்குனர், “இந்தப் படம் முழுக்க குடும்பங்களுக்காகவே உருவாக்கப்பட்டது. ஆன்லைன் விமர்சனங்களுக்காகவோ அல்லது சமூக வலைதளங்களில் கருத்து தெரிவிப்பவர்களுக்காகவோ நான் படம் எடுக்கவில்லை. இதனை படத்தின் வெளியீட்டிற்கு முன்பே தெளிவுபடுத்திவிட்டேன். மக்கள் விரும்பும் வகையில் படம் அமைந்தால், அவர்கள் நிச்சயம் ஆதரவு தருவார்கள் என்ற நம்பிக்கை எங்களுக்கு இருந்தது. இன்று திரையரங்குகளில் அது நிஜமாகியுள்ளது” என்றார்.
கொண்டாட்டங்கள் குறித்த விளக்கம்
திரையரங்குகளில் சிலர் சாமி ஆடுவது போன்ற கொண்டாட்டங்கள் குறித்து எழுந்த கேள்விகளுக்குப் பதிலளித்த அவர், “தயாரிப்பு நிறுவனம் சார்பில் ஆட்களை அனுப்பி இவ்வாறு செய்ய வைத்ததாகச் சிலர் கூறுகிறார்கள். ஆனால், அவ்வாறு செய்ய முடிந்தால் படத்தின் மொத்த பட்ஜெட்டை விட அந்த செலவு அதிகமாகிவிடும். இது முழுக்க முழுக்க ரசிகர்களின் உணர்ச்சிகரமான கொண்டாட்டமே தவிர, திட்டமிட்டு செய்யப்பட்ட ஒன்று அல்ல” என்று விளக்கமளித்தார்.
Leave a Reply