மேற்காசிய நாடான ஈரான் மீதான ராணுவ நடவடிக்கைகளை கையாள்வதில் அமெரிக்கா மற்றும் இஸ்ரேல் நாடுகளுக்கு இடையே கருத்து வேறுபாடுகள் நிலவுவதாக சர்வதேச அரசியல் ஆய்வாளர்கள் தெரிவித்துள்ளனர். ஈரானின் அணு ஆயுதத் திட்டங்களை முழுமையாக முறியடிக்க வேண்டுமானால், உடனடியாகக் கடுமையான ராணுவத் தாக்குதலைத் தொடுப்பதே ஒரே வழி என்று இஸ்ரேல் பிரதமர் பெஞ்சமின் நெதன்யாகு திட்டவட்டமாகத் தெரிவித்துள்ளார்.
பேச்சுவார்த்தை மற்றும் ராணுவ நடவடிக்கை
இருப்பினும், அமெரிக்க அதிபர் டிரம்ப் இந்த விவகாரத்தில் சற்று நிதானமான அணுகுமுறையைக் கடைப்பிடித்து வருகிறார். ராணுவ நடவடிக்கைக்குச் செல்வதற்கு முன்னதாக, தூதரக ரீதியிலான பேச்சுவார்த்தைகளுக்கு இன்னும் ஒரு வாய்ப்பு வழங்கலாம் என்ற எண்ணத்தில் அவர் இயங்கி வருகிறார். இந்த நிலைப்பாட்டின் ஒரு பகுதியாக, வளைகுடா நாடுகளின் கோரிக்கையை ஏற்று, ஈரான் மீது திட்டமிடப்பட்டிருந்த ராணுவத் தாக்குதலை டிரம்ப் தற்காலிகமாக ஒத்திவைத்தார்.
நள்ளிரவு அவசர ஆலோசனை
இந்நிலையில், இஸ்ரேலின் முன்னணி செய்தி நிறுவனமான ‘சேனல் 12’ வெளியிட்டுள்ள தகவலின்படி, அதிபர் டிரம்ப் மற்றும் பிரதமர் நெதன்யாகு ஆகிய இருவரும் நேற்று முன்தினம் நள்ளிரவில் நீண்ட நேரம் உரையாடியுள்ளனர். இந்த உரையாடல் மிகவும் தீவிரமான விவாதங்களுடன் நடந்ததாகக் கூறப்படுகிறது. ஈரான் மீதான அடுத்தகட்ட நகர்வுகள் குறித்து இரு தலைவர்களும் இறுதி முடிவை எடுக்கும் நிலையில் உள்ளனர்.
கடந்த மூன்று நாட்களுக்குள் இந்த இரு தலைவர்களும் இரண்டாவது முறையாகப் பேசிக்கொண்டுள்ளனர். முன்னதாக நடந்த சந்திப்பில், டிரம்ப் தனது சீனப் பயணம் மற்றும் அந்நாட்டு அதிபர் ஷி ஜின்பிங்குடனான சந்திப்பு குறித்து நெதன்யாகுவிடம் விரிவாகக் கலந்துரையாடியதாகத் தகவல்கள் தெரிவிக்கின்றன. அதைத் தொடர்ந்து தற்போது மீண்டும் ஈரான் விவகாரம் குறித்து அவசர ஆலோசனை மேற்கொள்ளப்பட்டுள்ளது.
Leave a Reply